سینیٹ کی 19 نشستوں کے لیے قومی ، سندھ اور پنجاب کی اسمبلیوں میں ووٹنگ ہوئی، پاکستان پیپلزپارٹی نے سب سے زیادہ 11 اور مسلم لیگ (ن) 9 نشستیں حاصل کرلیں

سندھ کی 7 جنرل، 2 خواتین ،2 ٹیکنو کریٹ یا علماء اور ایک غیر مسلم نشست پر انتخابات کا عمل سندھ اسمبلی میں صبح 9 بجے شروع ہوا جو شام 4 بجے تک بلا تعطل جاری رہا۔

دوسری جانب پنجاب اسمبلی میں بھی سینیٹ الیکشن کے لیے ووٹنگ کا عمل صبح 9 بجے شروع ہوگیا جوکہ شام 4 بجے تک جاری رہا، صوبائی الیکشن کمشنر اعجاز انور چوہان پنجاب اسمبلی پہنچے تھے۔

سندھ

سینیٹ کی 12 نشستوں پر 20 امیدوار مدمقابل تھے، جن میں سے 10 پاکستان پیپلزپارٹی (پی پی پی)، ایک نشست متحدہ قومی موومنٹ (ایم کیو ایم) پاکستان اور ایک آزاد امیدوار نے حاصل کی۔

جنرل نشستوں پر پی پی پی کے اشرف علی جتوئی، دوست علی جیسر، کاظم علی شاہ، مسرور احسن، ندیم بھٹو، ایم کیو ایم کے عامرچشتی اور آزادامیدوار فیصل واوڈا سینیٹر منتخب ہوئے۔

خواتین کی مخصونشستوں پر پاکستان پیپلزپارٹی (پی پی پی) کی قرة العین مری 59 اور روبینہ قائم خانی 58 ووٹ حاصل کرکے سینیٹر منتخب ہوئیں۔

ٹیکنوکریٹس کی نشستوں پر پیپلز پارٹی کے سرمد علی 59 اور بیرسٹرضمیر گھمرو 58 ووٹ لے کر کامایب ہوئے جب کہ اقلیتوں کی نشست پر پیپلز پارٹی کے پنجومل بھیل سینیٹر منتخب ہوئے۔

پنجاب

پنجاب سےسینیٹ کےانتخابات کامرحلہ مکمل ہوگیا۔ مسلم لیگ ن پنجاب سےسینیٹ میں اکثریتی جماعت بن گئی۔

ن لیگ نے پنجاب سے سینیٹ کی 12 میں سے 9 نشستیں حاصل کر لیں۔ جنرل نشستوں پر 4 جب کہ 2 ٹیکنوکریٹ،2خواتین،1اقلیتی نشست ن لیگ کو حاصل ہوئی۔

خواتین کی نشست پرانوشہ رحمان اوربشریٰ انجم بٹ منتخب ہوگئیں ۔ اقلیتی نشست پرطاہر خلیل سندھوسینیٹرمنتخب ہو گئے۔ ٹیکنوکریٹ نشستوں پرمصدق ملک،محمداورنگزیب کامیاب قراردیےگئےہیں

خیبرپختونخوا

خیبرپختونخوا میں سینیٹ کی 11 نشستوں پر انتخابات ملتوی کردئیے گئے ہیں۔

کے پی اسمبلی میں پی پی پی کے اپوزیشن رہنما احمد کریم کنڈی نے حلف نہ لیے جانے والے اراکین کے دستخطوں پر مشتمل درخواست صوبائی الیکشن کمشنر کے پاس جمع کرائی جس میں کہا گیا کہ الیکشن کمیشن کی واضح ہدایات کے باوجود حلف نہیں لیا جا رہا لہذا سینیٹ الیکشن ملتوی کیے جائیں، پہلے ہم سے حلف لیا جائے اور پھر سینیٹ کے الیکشن کروائے جائیں۔

اپوزیشن کی درخواست پر الیکشن کمیشن نے کے پی میں 11 نشستوں پر الیکشن ملتوی کردیے۔

بلوچستان

بلوچستان اسمبلی سے تمام 11 امیدوار بلامقابلہ منتخب ہوچکے ہیں۔

واضح رہے کہ اس سال سینیٹ کی 48 نشستیں خالی ہوئی تھیں جن میں سے 18 پر سینیٹرز بلا مقابلہ منتخب ہوگئے۔ بلوچستان اسمبلی سے تمام 11 امیدوار جب کہ پنجاب میں 7 امیدوار بلامقابلہ منتخب ہوئے تھے۔