پی ڈی ایم اے نے خیبر پختونخوا میں گلیشئیرز پگھلنے سے نو اضلاع میں سیلابی صورتحال کی پیشنگوئی کی ہے۔

تفصیلات کے مطابق پی ڈی ایم اے خیبر پختونخوا نے صوبے کے متعدد اضلاع میں گلیشئیرز کے پگھلنے سے سیلابی صورتحال کی الرٹ جاری کردی۔

ڈائریکٹر جنرل پی ڈی ایم اے خیبر پختونخوا  کے دفتر سے جاری کردہ ایک اعلامئے میں کہا گیا ہے کہ صوبے کے نو اضلاع چترال اپر، چترال لوئر ، سوات ، دیر اپر، دیر لوئر ، کوہستان اپر، کوہستان لوئر ، مانسہرہ اور کُرم میں سیلابی صورتحال سامنے آ سکتی ہے۔

مذکورہ اضلاع کی انتظامیہ  اور دیگر متعلقہ ادروں کو ہدایات جاری کی گئی ہیں کہ اپنے اپنے اضلاع میں فیلڈ سٹاف سے صورتحال کی مانیٹرنگ کروائی جائے۔

پی ڈی ایم اے کے اعلامیئے کے مطابق کسی بھی خطرے کی صورت میں متعلقہ ضلعی انتظامیہ مقامی ابادی کی اگاہی اور محفوظ مقامات پر منتقلی کے بروقت انتظامات کئے جائیں ۔

ڈائریکٹر جنرل پی ڈی ایم اے محمد قیصر خان نے بتایا کہ  اگر بروقت حفاظتی اقدامات نہ اٹھائے گئے تو مذکورہ سیلابی صورتحال سے بھاری جانی و مالی نقصانات کا خدشہ ہے۔

ڈائریکٹر جنرل محمد قیصر خان نے واضح کیا کہ پی ڈی ایم اے کا کنٹرول روم  مکمل طور پر فعال ہے اور عوام کسی بھی ناخوشگوار واقعے کی اطلاع کنٹرول روم نمبر 1700 پر اطلاع دے سکتے ہیں۔

دریں اثناء این ڈی ایم اے کی طرف سے جاری ہونے والے ایک اعلامئے میں ملک بھر میں 23 اپریل سے 29 اپریل تک ایک اور موسمیاتی نظام پاکستان میں داخل ہونے کا امکان  ہے جس کیلئے ملک بھر میں متعلقہ اداروں کو الرٹ رہنے کی ہدایات جاری کی گئی ہیں۔