پاک فوج کے شعبہ برائے تعلقاتِ عامہ آئی ایس پی آرکی جانب سے جاری بیان میں کہا گیا کہ سیکیورٹی فورسز نے پاک افغان بین الاقوامی سرحد پر دہشت گردوں کی دراندازی ناکام بنا دی۔ 

آئی ایس پی آر کے مطابق سیکیورٹی فورسز نے 7 دہشت گردوں کی نقل و حرکت کا پتہ چلنے پر شمالی وزیرستان کے علاقے سپن کئی غلام خان میں کارروائی کی، سیکیورٹی فورسز کی جانب سے دہشت گردوں کو گھیرے میں لے لیا گیا۔

آئی اس پی آر کا کہنا ہے کہ سیکیورٹی فورسز اور دہشت گردوں کے درمیان شدید فائرنگ کا تبادلہ ہوا۔ سیکیورٹی فورسز نے کارروائی میں 7 دہشت گردوں کو ہلاک کر دیا۔ ہلاک ہونے والے دہشت گردوں سے بڑی مقدار میں اسلحہ اور بارودی مواد برآمد ہوا۔

آئی ایس پی آر کے مطابق پاکستان بارہا عبوری افغان حکومت سے مؤثربارڈر مینجمنٹ سسٹم لاگو کرنے کا مطالبہ کر چکا ہے۔ توقع ہے کہ عبوری افغان حکومت اپنی ذمہ داریاں ادا کرے گی۔عبوری افغان حکومت پاکستان کے خلاف دہشت گردی کی کارروائیوں کے لیے اپنی سرزمین کا استعمال روکے گی۔

آئی ایس پی آر کا کہنا ہے کہ پاکستان کی سیکیورٹی فورسز وطن عزیزسے دہشت گردی کی لعنت کے خاتمے اوراپنے بارڈرزکومحفوظ بنانےکےلیےپرعزم ہیں، سیکیورٹی فورسزوطن سےدہشتگردی کاخاتمہ یقینی بنائیں گی۔