اسرائیل نے پیر کے روز فلسطینی سرزمین سے حراست میں لیے گئے 150 کے قریب قیدیوں کو رہا کردیا۔

بین الاقوامی خبررساں ادارے کے مطابق  اسرائیل نے غزہ پر حملوں کے دوران یرغمال بنائے گئے 150 فلسطینوں کو رہا کردیا۔

 غزہ کراسنگ اتھارٹی کے ترجمان نے کہا کہ رہا ہونے والے فلسطینی قیدیوں کو علاج کے لیے اسپتال منتقل کردیا گیا ہے۔

غزہ کی کراسنگ اتھارٹی کے ترجمان نے مزید کہا کہ حراست میں قیدیوں کے ساتھ بدسلوکی کی گئی۔

اسرائیل کی قید سے رہائی پانے والے فلسطینیوں کا کہنا ہے کہ اسرائیلی فوجی بدترین تشدد کے دوران حماس سے متعلق سوالات کرتے رہے۔

دوسری جانب  اسرائیلی فوج نے ان قیدیوں کی رہائی پر کوئی تبصرہ نہیں کیا لیکن کہا کہ حراست میں لیے گئے افراد کے ساتھ ناروا سلوک بالکل ممنوع ہے۔

فوج  کے ترجمان نے کہا وہ لوگ جو دہشت گردی کی سرگرمیوں میں ملوث نہیں ہیں، انہیں غزہ کی پٹی میں واپس چھوڑ دیا جاتا ہے۔

واضح رہے کہ فلسطینی پرزنرز ایسوسی ایشن کے مطابق غزہ اور مغربی کنارے سے تعلق رکھنے والے 9 ہزار ایک سو فلسطینی اسرائیل کی قید میں ہیں۔

ان قیدیوں میں گزشتہ سال 7 اکتوبرسے غزہ پر اسرائیلی حملوں کے دوران یرغمال بنائے گئے افراد شامل نہیں ہیں۔