یہ حیران کن خبر ہندوستان سے آئی جہاں ایک کروڑ پتی جوڑے نے اپنا تمام مال خیرات کر کے ایک ایسی زندگی اپنانے کا فیصلہ کیا ہے جس میں وہ مختصر ترین سامان کے ساتھ بھیک مانگ کر اپنا گزربسر کریں گے۔

واضح رہے کہ اس جوڑے کا تعلق جین مت سے ہے اور اس مذہب کے پیروکاروں کو راہب بننے کے لیے اپنی تمام دولت کو خیرات کرنا ہوتا ہے اور مختصر سے سامان کےساتھ دوسروں کے بھیک پر انحصار کرنا پڑتا ہے۔ یہی وجہ ہے اس جوڑے نے بھی رہبانیت کو اپنانے کے لیے خیرات میں 24 ملین ڈالر دے دیئے ہیں۔

ہندوستان کے گجرات سے تعلق رکھنے والے اس امیر ترین جوڑے نے اپنی پوری دولت جوکہ 200 کروڑ روپے سے زائد ہے خیراتی کاموں میں عطیہ کر کے جین بھکشو بننے کا فیصلہ کیا ہے۔

بھاویش بھنڈاری اور ان کی اہلیہ ایک انتہائی منافع بخش تعمیراتی کاروبار سے وابستہ تھے اور اسی کاروبار نےانہیں 200 کروڑ یعنی 24 ملین ڈالر کا مالک بنا دیا، جبکہ ایک عرصے تک انہوں اس دولت کی وجہ سے ایک شاہانہ زندگی گزاری ہے۔ اور دوسرے کروڑ پتیوں کی طرح، انہوں نے بھی شاندار مکانات، مہنگی گاڑیوں کے ساتھ دل کی ہر خواہش پوری کی ہے  اور عیش و آرام کی زندگی کا لطف اٹھایا ہے۔

تاہم اس جوڑے نے اپنے دونوں بچوں  16 سالہ بیٹا اور  19 سالہ بیٹی سے متاثر ہو کر جین سنیاسی راہب بننے کے لیے یہ سب کچھ ترک کرنے کا فیصلہ کیا ہے، ان کے دونوں بچے 2022 میں یہی راستہ اختیار کر چکے ہیں۔22 اپریل کو گجرات سے تعلق رکھنے والا یہ جوڑا اپنی تمام دنیاوی املاک کو ترک کر دے گا، اپنے خاندانوں سے تعلقات منقطع کر دے گا، اور صرف خیرات پر زندہ رہ کر پورے ہندوستان میں ننگے پاؤں سفر شروع کر دے گا۔

باضابطہ طور پر سنیاسی طرز زندگی کو اپنانے کے بعد، بھاویش اور ان کی اہلیہ کو دو سفید کپڑے، ایک بھیک کا پیالہ، اور ایک “راجوہرن” جو کہ اس مذہب کے پیشوا کی جانب سے دی جاتی ہے رکھنے کی اجازت ہوگی ہے۔

راجوہرن ایک سفید جھاڑو کی طرح ہوتی ہے جو جین راہب بیٹھنے سے پہلے کسی جگہ کو صاف کرنے کے لیے استعمال کرتے ہیں اور یہ ایک علامت ہوتی ہے کہ یہ شخص راہب بن چکاہے۔

گجرات میں مقیم تاجر بھاویش بھنڈاری اور ان کی اہلیہ کو ایک جلوس میں اپنی زندگی بھر کا 200 کروڑ روپے سے زائد کاسامان مجمع میں بانٹتے ہوئے دیکھا جاسکتا ہے ۔