چیئرمین پاک سرزمین پارٹی مصطفیٰ کمال نے کہا ہے کہ وفاق اور سندھ حکومت سمیت سب کراچی سے کچرا اٹھانے میں ناکام ہوگئے ہیں، کرپشن کی وجہ سے مسائل میں دن بدن اضافہ ہوتا جارہا ہے۔

پاکستان ہاؤس کراچی میں پریس کانفرنس کرتے ہوئے سربراہ پی ایس پی مصطفیٰ کمال نے کہا کہ اس شہر میں کچرا اٹھانا مسئلہ بن کر رہ گیا ہے، پہلےوفاق پھر صوبائی حکومت سمیت سب فیل ہوگئے، اب توکتے کے کاٹنےکی خبریں بہت زیادہ عام ہوچکی ہیں کتے کاٹےکی ویکسین سرکاری اسپتالوں میں میسر نہیں۔

انہوں نے کہا کہ سندھ حکومت کی کرپشن کا حال تو یہ ہے کہ کتوں کو دینے والے زہر میں بھی ملاوٹ ہورہی ہے۔ کتے کو کھلانے والے زہر میں بھی کرپشن ہورہی ہے۔ زہر کھانے کے بعد بھی  انہیں  موت نہیں آتی۔

انہوں نے کہا کہ کراچی کے لوگ جب تک برداشت کرتے رہیں گے تب تک ظلم ہوتا رہے گا۔ ہمیں پی ٹی آئی سے بہت سی امیدیں تھیں۔ وزیر اعظم نے کراچی کے 4 دورے کی۔ لیکن ان دوروں سے کراچی کے حالات میں کوئی فرق نہیں آیا۔

ان کا مزید کہنا تھا کہ پاک سر زمین پارٹی کے لیے بہت اہم موقع ہے۔ بلوچستان سے آئے لوگ پارٹی میں شمولیت کے لیے آرہے ہیں۔ پاک سرزمین پارٹی اس ملک کا مستقبل ہے۔ہمارے ماضی میں کئے گئے کام آج بھی دنیا یاد رکھتی ہے۔ پاکستان کی معاشی حالت بہت خراب ہے۔ اس وقت لوگوں کی بہت بڑی تعداد پاک سر زمین پارٹی میں شامل ہورہی ہے۔

اس موقع پر مصطفی کمال نے پی ایس پی میں بلوچستان سے تعلق رکھنے والے سیاسی شخصیت میر شمس مینگل کی شمولیت کابھی اعلان کیا اور میرشمس مینگل کو مبارکباد دی۔