ڈی جی آئی ایس پی آر میجر جنرل آصف غفور نے کہا ہے کہ خصوصی عدالت کے فیصلے پر افواجِ پاکستان میں شدید غم و غصہ اور اضطراب ہے، جنرل پرویز مشرف کسی صورت بھی غدار نہیں ہو سکتے۔

  تفصیلات کے مطابق سماجی رابطے کی ویب سائٹ ٹوئٹر پر اپنے ایک پیغام میں ڈی جی آئی ایس پی آر میجر جنرل آصف غفور نے جنرل پرویز مشرف سے متعلق فیصلے پر ردِ عمل دیتے ہوئے کہا کہ عدالتی کارروائی شخصی بنیاد پر کی گئی، جنرل پرویز مشرف کو اپنے دفاع کا بنیادی حق نہیں دیا گیا۔

Statement on decision by Special court about General Pervez Musharraf, Retired. pic.twitter.com/C9UAMT1E4W

— DG ISPR (@OfficialDGISPR) December 17, 2019

اپنے بیان میں ڈی جی آئی ایس پی آر میجر جنرل آصف غفور نے کہا کہ جنرل پرویز مشرف آرمی چیف، چئیرمین جوائنٹ چیفس آف سٹاف کمیٹی اور صدرِ پاکستان رہے ہیں۔

میجر جنرل آصف غفور کا کہنا تھا کہ جنرل پرویز مشرف نے 40سال سے زیادہ پاکستان کی خدمت کی ہے اور انھوں نے ملک کے دفاع کے لیے جنگیں بھی لڑی ہیں۔

سنگین غداری کیس، پرویزمشرف کو سزائےموت کا حکم

میجر جنرل آصف غفور کا کہنا تھا کہ خصوصی کورٹ کی تشکیل کے لیے قانونی تقاضے پورے نہیں کیے گئے جبکہ جنرل پرویز مشرف کیس میں آیئنی اور قانونی تقاضے  بھی پورے نہیں کیے گئے اور کیس کو عجلت میں نمٹایا گیا ہے۔

ڈی جی آئی ایس پی آر میجر جنرل آصف غفور کا مزید کہنا تھا کہ افواجِ پاکستان توقع کر تی ہیں کہ جنرل پرویز مشرف کو آئین پاکستان کے تحت انصاف دیا جائے گا۔

واضح رہے اس سے قبل پرویز مشرف سنگین غداری کیس میں اسلام آباد کی خصوصی عدالت کی جانب سے فیصلہ سنا دیاگیا تھا، خصوصی عدالت نے پرویزمشرف کو سزائے موت کاحکم دیا تھا ۔

چیف جسٹس پشاورہائیکورٹ اورخصوصی عدالت کے سربراہ جسٹس وقارسیٹھ کی سربراہی میں 3 رکنی بینچ نےسابق صدرپرویز مشرف کے خلاف سنگین غداری کیس کی سماعت کی اور جسٹس سیٹھ وقار نے چار سطروں پر مشتمل مختصر فیصلہ پڑھ کر سنایا تھا۔