آرمی چیف جنرل قمر جاوید باجوہ ایک روزہ سرکاری دورے پر کویت پہنچ گئے۔

 پاک فوج کے شعبہ تعلقات عامہ (آئی ایس پی آر) کے مطابق آرمی ہیڈ کوارٹرز پہنچنے پر کویتی مسلح افواج کے چیف آف جنرل اسٹاف لفٹیننٹ جنرل محمد خالد نے آرمی چیف کا استقبال کیا جبکہ کویت آرمی کے  دستے نے آرمی چیف جنرل قمر جاوید باجوہ کو گارڈ آف آنر بھی  پیش کیا۔

آرمی چیف جنرل قمر جاوید باجوہ ایک روزہ سرکاری دورے پر کویتی نائب وزیر اعظم اور وزیر دفاع شیخ احمد منصور الاحمد الجابر الصباح ، کویتی مسلح افواج کے چیف آف جنرل سٹاف لیفٹیننٹ جنرل محمد خالد الخدر اور انڈر سیکرٹری نیشنل گارڈ لیفٹیننٹ جنرل سٹاف انجینئر ہاشم عبدالرزاق سے الگ الگ ملاقاتیں کیں۔

آرمی چیف کا فرسٹ پی ایم اے لانگ کورس کے شرکاء کو خراج تحسین

ملاقاتوں کے دوران باہمی دلچسپی کے امور ، دوطرفہ دفاعی اور سکیورٹی تعاون سمیت علاقائی امن اور استحکام پر تبادلہ خیال کیا گیاجبکہ کویت کی سیاسی اور عسکری قیادت نے پاک فوج کی پیشہ وارانہ مہارت اور دہشت گردی کا مقابلہ کرنے میں پاکستانی قوم کے عزم اور حوصلے کو بے حد سراہا۔

ترجمان آئی ایس پی آر   کا کہنا تھا کہ ان ملاقاتوں کے دوران باھمی دفاعی اور سیکیورٹی تعاون کے فروغ سمیت تربیت، دفاعی پیداوار اور افرادی قوت کے شعبوں میں دو طرفہ تعاون بڑھانے پر اتفاق رائے پایا گیا۔

ترجمان آئی ایس پی آر کا یہ بھی کہنا تھا کہ دونوں ممالک دفاعی مصنوعات کی برآمد ، تربیت ، تربیت یافتہ افرادی قوت اور دہشت گردی کے خاتمے کے سلسلے میں تعاون کریں گے۔