معاون خصوصی زلفی بخاری نے کہا ہے کہ پاکستان تحریک انصاف کی حکومت شہریوں کو کرونا وائرس سے بچانے کے لئے تمام ممکنہ اقدامات کرنے کے لئے پرعزم ہے۔

تفصیلات کے مطابق معاون خصوصی زلفی بخاری سے فرانسیسی سفیرمارک بریٹی کی ملاقات ہوئی ، ملاقات میں خطے کے سیاسی اور اقتصادی امور پر تبادلہ خیال کیا گیا اور کرونا وائرس سے نمٹنے کے لئے حکومتوں کی حکمت عملی پر تفصیلی گفتگو کی گئی۔

اس موقع پر فرانسیسی سفیر نے کہا فرانس احتیاط کیساتھ ووہان سے شہریوں کے انخلا پر کام کررہاہے، فرانس میں موسم سرما کے فلوکی وجہ سے 15 ہزار افراد ہلاک ہوتے ہیں۔

فرانسیسی سفیرمارک بریٹی سے ملاقات میں معاون خصوصی زلفی بخاری نے بیرون ملک مقیم پاکستانیوں کے بارے میں کہا  کہ پاکستان کا فی الحال چین سے طلبا کے انخلا کا کوئی منصوبہ نہیں ہے،  پاکستان میں کوئی بھی وبا تباہ کن ہوسکتی ہے۔

معاون خصوصی زلفی بخاری نے مزید کہا کہ حکومت اپنے 220 ملین لوگوں کے تحفظ کی ذمہ دار ہے، کرونا وائرس کے خطرے سے نمٹنے کے لئے مالی اعانت منظور کرلی گئی ہے، اسلام آباد ایئرپورٹ پر قرنطینہ مرکز قائم کیا جا رہا ہے جس میں کروناوائرس کے تین سو مریضوں کے علاج کی گنجائش ہو گی۔

وزیراعظم کے معاون خصوصی زلفی بخاری کیخلاف نیب نے تحقیقات بند کردیں

واضح رہے کہ اس سے قبل نیب کے ایگزیکٹو بورڈ نے عمران خان کے معاون خصوصی زلفی بخاری کیخلاف تحقیقات بند کرنے کی منظوری دے دی تھی۔

چیئرمین نیب جسٹس (ر) جاوید اقبال کی زیر صدارت نیب ایگزیکٹو بورڈ کا اجلاس ہوا جس میں زلفی بخاری کے خلاف تحقیقات بند کرنے کا فیصلہ ہوا تھا۔

اجلاس کے بعد جاری نیب کی جانب سے ایک اعلامیے میں کہا گیا  تھا کہ وزیراعظم کے معاون خصوصی برائے سمندر پار پاکستانی و ترقی انسانی وسائل زلفی بخاری کے خلاف نیب انکوائری بند کرنے کی منظوری دی گئی ہے۔ انکوائری بند کرنے کی منظوری عدم شواہد کی بنیاد پر دی گئی۔