صدر مملکت ڈاکٹر عارف علوی کا کہنا ہے کہ  چین کے ساتھ دوستی پاکستان کی خارجہ پالیسی کا اہم ستون ہے ۔

تفصیلات کے مطابق  صدر مملکت ڈاکٹر عارف علوی سے چینی وزیر دفاع وے فَنگ نے ملاقات کی۔

ملاقات میں  دونوں ممالک کے  باہمی مفاد کے  لیے دوستی کو مزید مستحکم کرنے کے عزم کا اعادہ کیا گیا۔

صدر مملکت نے کہا کہ  چین کے ساتھ دوستی پاکستان کی خارجہ پالیسی کا اہم ستون ہے ۔پاکستان خطے کو درپیش سیکیورٹی چیلنجز کا مقابلہ  کرنے  کے لیے چین کے ساتھ تعلقات کو مزید مستحکم کرنا چاہتا ہے ۔

ڈاکٹر عارف علوی نے کہا کہ  پاکستان ون چائنہ پالیسی ، تائیوان ، تبت ، سنکیانگ اور بحیرہ جنوبی چین پر چین کی حمایت کرتا ہے۔

انہوں نے مزید کہا کہ  بھارتی بالادستی کے عزائم سے علاقائی امن و استحکام کو خطرہ لاحق ہے۔ بھارت بلوچستان میں دہشت گردی کی سرگرمیوں ملوث اور چین پاکستان اقتصادی راہداری کو سبوتاژ کرنا چاہتا ہے۔

صدر مملکت نے کہا کہ دونوں ممالک کے مابین دفاعی تعاون  کو مزید وسعت دینے کی ضرورت ہے ۔

صدر عارف علوی نے چین کی معاشی ترقی اور چینی حکومت کے کورونا وبا ءکے خلاف اقدامات ، مسئلہ کشمیر اور اس پر سلامتی کونسل کا اجلاس بلانے پر چینی حمایت کی تعریف کی۔

چینی وزیر دفاع جنرل وے فنگ  نے کہا کہ  پاکستان اور چین کے مابین فوجی تعلقات میں نمایاں پیشرفت ہوئی ہے اور امید ہے کہ کے اس دورے سے دفاعی تعاون کو مزید تقویت ملے گی۔

انہوں نے کہا کہ  چین پاکستان کے ساتھ ترقی کے فوائد بانٹنا چاہتا ہے جو پاکستان کی معاشی ترقی میں مددگار ہوں گے۔

چینی وزیر دفاع نے کورونا وبا ءکے دوران طبی سامان بھیجنے  اور مارچ 2020  میں چین کا دورہ کرنے والے واحد غیر ملکی شخصیت ہونے پر صدر عارف علوی شکریہ ادا کیا۔

انہوں نے مزید کہا کہ پاکستان کی جانب سے نشان امتیاز (ملٹری) کا ایوارڈ عطا کرنا دونوں ممالک کے مابین حقیقی دوستی کا عکاس ہے۔