صوبائی وزیر برائے انصرام قدرتی آفات میاں خالد محمود نے چکوال میں تحصیل تلہ گنگ کے دیہات دودیال کا دورہ کیا۔

دورے کے دوران صوبائی وزیر نے سانحہ مری میں شہید ہونے والے اے ایس آئی کے خاندان سے ملاقات کی اور لواحقین سے اپنے پیاروں کی ناگہانی موت پر اظہار تعزیت اور دعا کی۔

اس موقعے پر میاں خالد محمود نے حکومت پنجاب کی جانب سے اے ایس آئی افسر نوید اور ان کی گاڑی میں وفات پانے والے خاندان کے آٹھ افراد میں آٹھ، آٹھ لاکھ روپے کے امدادی چیکس کی تقسیم بھی کی۔ متاثر ہونے والے تین خاندانوں میں مجموعی طور پر 64 لاکھ روپے تقسیم کیے گئے۔

ان کا کہنا تھا کہ سانحہ مری میں قیمتی جانوں کے زیاں پر دلی افسوس ہے، وزیر اعلیٰ پنجاب جناب عثمان بزدار کی جانب سے ذمہ داران کے خلاف کارروائی کا آغاز کیا جا چکا ہے۔

انہوں نے کہا کہ متعلقہ اداروں کی کارکردگی سب کے لیے ایک سوالیہ نشان ہے، مستقبل میں ایسے قدرتی حادثات کے سبب نقصانات پر کنٹرول کے لیے جامع منصوبہ بندی کی جا رہی ہے۔

میاں خالد محمود کا کہنا تھا کہ موثر مانیٹرنگ کے ذریعے انتظامی اداروں کی فعالیت کو بہتر بنایا جا رہا ہے، دکھ کی اس گھڑی میں متاثرہ خاندانوں کے ساتھ غم میں برابر کے شریک ہیں۔

ان کا کہنا تھا کہ حکومت سیاحتی مقامات پر انتظامی خرابیوں کی دوری کے لیے ٹھوس اقدامات لے رہی ہے، عوام سے اپیل ہے کہ وہ قدرتی آفات سے تحفظ کے لیے انتظامی اداروں کے احکامات اور احتیاطی تدابیر کو نظر انداز نہ کریں۔

صوبائی وزیر برائے انصرام قدرتی آفات میاں خالد محمود نے مزید کہا کہ قانون نافذ کرنے والے اداروں اور انتظامیہ کے ساتھ عوام کا عدم تعاون بھی بڑے نقصانات کا پیش خیمہ بنتا ہے۔