پاکستان تحریک انصاف (پی ٹی آئی) کے چیئرمین اور سابق وزیراعظم عمران خان نے شوکت خانم اسپتال سے روانگی کچھ دیر کے لیے موخر کردی ہے۔
ذرائع کے مطابق چئیرمین تحریک انصاف عمران خان نے شوکت خانم میں مشاورتی اجلاس بلا لیا ہے جس میں عمران خان پر ہونے والے قاتلانہ حملے کے حوالے سے قانونی مشاورت ہو گی۔
ذرائع نے بتایا کہ اجلاس میں تحریک انصاف کے رہنماؤں کیساتھ قانون دان بھی شرکت کریں گے جبکہ اجلاس میں معروف قانون دان اعتزاز احسن کی شمولیت بھی متوقع ہے۔
ذرائع کا کہنا ہے کہ تحریک انصاف کے رہنماؤں کو شوکت خانم پہنچنے کی ہدایت کردی گئی ہے، تاحال عمران خان و لانگ مارچ پر قاتلانہ حملے کا مقدمہ درج نہیں ہوسکا ہے۔
اس موقع پر اسپتال انتظامیہ کا کہنا ہے کہ عمران خان شوکت خانم اسپتال سے ڈسچارج ہو چکے ہیں۔
شوکت خانم اسپتال کا وضاحتی بیان
شوکت خانم اسپتال نے عمران خان کو گولی لگنے پر اپنے وضاحتی بیان میں کہا کہ عمران خان کی دائیں ٹانگ سے ٹکڑے نکالے گئے، ان کے جسم میں گولی کے ٹوٹل 4 ٹکڑے تھے۔
شوکت خانم اسپتال نے بتایا کہ عمران خان کی بائیں ٹانگ سے ٹکڑا نہیں نکالا گیا، عمران خان اسپتال پہنچنے پر مکمل ہوش میں تھے۔
شوکت خانم اسپتال نے مزید کہا کہ عمران خان کا آپریشن ٹکڑے نکالنے کے لیے کیا گیا، اب عمران خان کی حالت تیزی سے بہتر ہورہی ہے۔
خیال رہے کہ لانگ مارچ کے کنٹینر پر فائرنگ میں گولی لگنے سے زخمی عمران خان کا شوکت خانم اسپتال میں چوتھے روز بھی علاج معالجہ جاری تھا جبکہ 4 رکنی میڈیکل بورڈ نے 9 بجے عمران خان کا طبی معائنہ کیا تھا۔
اسپتال انتظامیہ نے بتایا کہ عمران خان معمول کے ٹیسٹ کیے گئے شوگر بلڈ پریشر نارمل ہے اور انکے زخم میں بہتری بھی آرہی ہے۔
ذرائع اسپتال انتظامیہ کا کہنا تھا کہ عمران خان کو آج ڈسچارج کیے جانے کا امکان تھا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News