ترجمان پاک فضائیہ نے کہا ہے کہ پاک فضائیہ کا جے ایف-17 تھنڈر طیارہ بحرین انٹرنیشنل ایئر شو میں حاضرین کی توجہ کا مرکز رہا۔

پاک فضائیہ کے ترجمان کی جانب سے جاری کردہ بیان کے مطابق پاک فضائیہ نے بحرین انٹرنیشنل ایئر شو میں جے ایف-17 تھنڈر طیارے کی تعیناتی کے دوران ہوا سے ہوا میں ایندھن بھرنے کا مظاہرہ کیا۔

پاک فضائیہ نے اپنے تین جے ایف-17 لڑاکا طیارے بحرین انٹرنیشنل ایئر شو میں اپنے آئی ایل-78 ٹینکر طیارے کی معاونت سے تعینات کیے۔

ترجمان نے کہا کہ پاک فضائیہ نے ایک آپریشنل ایئر بیس سے بحرین جانے والے جیٹ طیاروں کی مسلسل پرواز اور ان کی وطن واپسی کے دوران جے ایف-17 تھنڈر طیاروں کی دورانِ پرواز ری فیولنگ کی، دورانِ پرواز ری فیولنگ سے پاک فضائیہ نے ایک اور سنگ میل حاصل کیا ہے جو مادر وطن کے ناقابل تسخیر فضائی دفاع کی جانب ایک اہم قدم ہے۔

ترجمان پاک فضائیہ کا کہنا ہے کہ جے ایف-17 تھنڈر طیارہ بحرین انٹرنیشنل ایئر شو میں حاضرین کی توجہ کا مرکز رہا، بین الاقوامی پانیوں پر دوران پرواز ایندھن بھرنے کے اس عہد ساز موقع نے پاک فضائیہ کے لڑاکا بیڑے کی صلاحیت، اہلیت اور مہلکیت میں اضافہ کیا ہے۔

یہ غیر معمولی اور اہم کامیابی پاک فضائیہ کے اہلکاروں کی بہترین پیشہ ورانہ مہارت اور اچھی تکنیکی تربیت کی عکاس ہے۔