لاہور: جناح اسپتال کے آرتھو یونٹ ون اور ٹو کی لڑائی سے مریض ذلیل و خوار ہونے لگے ہیں جب کہ جناح اسپتال کے آرتھو پیڈک میں اندھیر نگری چوپٹ راج برقرار رہے۔

تفصیلات کے مطابق لاہور جناح اسپتال کے آرتھو پیڈک یونٹ ون اور یونٹ ٹو کی لڑائی کی اندرونی کہانی بول نیوز منظر عام پر لے آیا ہے۔

سیکرٹری صحت ڈاکٹر احمد جاوید قاضی اور پرنسپل ڈاکٹر ندیم حفیظ بٹ کے احکامات کو ہوا میں اڑا دیا ہے جب کہ عرصہ چار سال کی سردِ جنگ نے عملی جنگ کا روپ دھار لیا ہے۔

یونٹ ٹو کے ایسوسی ایٹ پروفیسر ڈاکٹر جاوید، اسسٹنٹ پروفیسر ڈاکٹر سہیل سینئر رجسڑار ڈاکٹر عامر سہیل اور پی جی آر ڈاکٹر اکمل نے جونیئر ڈاکٹروں کے ہمراہ ہیڈ آف آرتھو پروفیسر ڈاکٹر سجاد گورائیہ اور ان کی ٹیم کو گالم گلوچ اور سنگین نتائج کی دھمکیاں دی اور انہیں آفس سے زبردستی نکال کر ان کے کمروں کے تالے بدل دیے ہیں۔

ان کا کہنا ہے کہ ہم نے وارڈ بنایا اور ہم ہی رہے گے۔ کھیل کے مرکزی کردار سابق پروفیسر آرتھو ڈاکٹر تحسین ریاض ہیں جنہوں نے اپنی اجارہ داری قائم رکھنے کے لیے جونیئر ڈاکٹروں کو استعمال کیا اور اسپتال کا ماحول خراب کرنا اولین ترجیح سمجھا۔

جناح اسپتال انتظامیہ نے دونوں آرتھو پیڈک یونٹ کے لیے تقریباً سات کروڑ کی خریادری کی مگر سابق پروفیسر ڈاکٹر تحسین ریاض نے پیشہ ورانہ حسد کی بنا پر یونٹ ٹو کے پروفیسر ڈاکٹر سجاد گورائیہ کو سرجیکل آلات کی تقسیم نہ ہونے دیں اور پروفیسر سجاد گورائیہ کے یونٹ کے ساتھ سوتیلی ماں جیسا سلوک کیا۔

آؤٹ ڈور کے دروازے ان ڈاکٹروں کے لئے بند کر دیے گئے جب کہ سابق پروفیسر ڈاکٹر تحسین ریاض کی ریٹائرمنٹ کے بعد خالی ہونے والی سیٹ پر یونٹ ٹو کے ہیڈ آف ڈیپارٹمنٹ کو محکمہ صحت کے ایس او پی کے مطابق پروفیسر سجاد گورائیہ کو پرنسپل نے  یونٹ  کے ہیڈ آف ڈیپارٹمنٹ کے احکامات جاری کیے جس کے ساتھ ایک مراسلہ بھی جاری کیا گیا۔

مراسلے کا آرڈر نمبر 25740 Aimc ہے جس میں پرنسپل نے اپنے اختیارات استعمال کرتے ہوئے پروفیسر سجاد گورائیہ کو سینئر ہونے کے ناطے ہیڈ آف ڈیپارمنٹ کے احکامات جاری کیے جس کی کاپی سیکرٹری صحت اور چیئرمین بورڈ آف مینجمنٹ کو بھی ارسال کی گئی۔

اگلے ہی روز پرنسپل پروفیسر ندیم حفیظ بٹ نے تمام فیکلٹی ممبران کی موجودگی میں پروفیسر سجاد گورائیہ کو ہیڈ آف ڈیپارٹمنٹ کے منصب پر بٹھایا۔

اس واقعے کے چوبیس گھنٹے گزرنے کے بعد جونیئر ڈاکٹروں نے ان احکامات کو ماننے سے انکار کر دیا اور یونٹ ون کے ہیڈ آف ڈیپارٹمنٹ پروفیسر سجاد گوارئیہ سے بد تمیزی کی اور ان کے آفس کو تالے لگا کر باہر نکال دیا۔

اس سارے واقعے سے پروفیسر سجاد گوارئیہ نے پرنسپل ندیم حفیظ بٹ کو باقاعدہ طور پر آگاہ کیا جس پر پرنسپل ندیم حفیظ بٹ آگ بگولہ ہوگئے اور انہوں نے کہا کہ میرے اوپر چیئرمین بورڈ کا پریشر ہے، میں اس میں بے بس ہوں جب کہ ضرورت اس امر کی ہے کہ مسیحاؤں کی لڑائی میں فائدہ کس کا ہوگا۔