وفاقی وزیر خارجہ بلاول بھٹو زرداری نے کہا ہے کہ ہمیں مل کر خطے کی بہتری کے لیے کام کرنے کی ضرورت ہے۔

وزیر خارجہ بلاول بھٹو زرداری نے تاشقند میں اقتصادی تعاون تنظیم کی وزرائے خارجہ کونسل کے 26واں اجلاس سے خطاب کرتے ہوئے کہا کہ دنیا کو موسمیاتی تبدیلی کے اثرات کا سامنا ہے۔

لائیو: وزیر خارجہ بلاول بھٹو زرداری کا تاشقند میں ہونے والے اکنامک کوآپریشن آرگنائزیشن کے 26ویں کونسل آف منسٹرز کے اجلاس سے خطاب https://t.co/IjPn8gnwjh

— PPP (@MediaCellPPP) January 24, 2023

سیلاب متاثرین کی مدد کرنے پر دنیا کے شکر گزار ہیں

انہوں نے کہا کہ 2022 میں پاکستان کو تاریخ کے بدترین سیلاب کا سامنا کرنا پڑا، 3کروڑ افراد سیلاب کے باعث متاثر ہوئے۔

وزیر خارجہ کا کہنا ہے کہ پاکستان میں سیلاب سے بڑے پیمانے پر تباہی ہوئی اور پاکستان موسمیاتی تبدیلی سے سب سے زیادہ متاثر ہوا۔

بلاول بھٹو زرداری نے مزید کہا کہ سیلاب متاثرین کی مدد کرنے پر دنیا کے شکر گزار ہیں، اب اٹھائے جانے والے اقدامات ہمارا مستقبل طے کریں گے، ایسا میکنزم بنانا ہوگا جو موسمیاتی تبدیلی کی تباہی سے نمٹنےمیں مدد دے۔

اس موقع پر وزیر خارجہ بلاول بھٹو زرداری ازبکستان کے دارالحکومت تاشقند میں ہونے والے اکنامک کوآپریشن آرگنائزیشن کے 26ویں کونسل آف منسٹرز کے اجلاس کے بعد اکنامک کوآپریشن آرگنائزیشن چارٹر کے معاہدے پر دستخط کیے، جس کے تحت آذربائیجان کے دارالحکومت باکو میں اکنامک کوآپریشن آرگنائزیشن کے تحقیقی ادارے کا قیام ہوگا۔

بھارت نے شنگھائی میں اجلاس میں شرکت کیلئے وزیرخارجہ کو دعوت نامہ بھیج دیا

دوسری جانب بھارت نے شنگھائی تعاون تنظیم، وزراء خارجہ اجلاس میں شرکت کے لئے وزیر خارجہ بلاول بھٹو زرداری کو دعوت نامہ بھیج دیا۔

سفارتی ذرائع کے مطابق بھارت کی جانب سے ایک دعوت نامہ چیف جسٹس آف پاکستان کے نام بھی بھجوایا گیا ہے، بھارت اس سال شنگھائی تعاون تنظیم کے منتظم صدر کے فرائض انجام دے رہا ہے۔

یہ بھی پڑھیں: وزیراعظم کی خارجہ پالیسی کامیاب ہوچکی ہے، وزیر خارجہ

ذرائع نے بتایا کہ شنگھائی تعاون تںطیم کا وزرا خارجہ کا اجلاس اس سال مئی میں بھارتی شہر گووا میں ہوگا اور مارچ کے مہینے میں شنگھائی تعاون تنظیم کے چیف جسٹسس کا اجلاس ہوگا جس کے لئے چیف جسٹس کو دعوت نامہ بھیجا گیا ہے۔

سفارتی ذرائع نے مزید بتایا کہ پاکستان کی جانب سے بھارت کے دیے گئے دونوں دعوت ناموں کا تاحال جواب نہیں دیا گیا، بھارت میں ہونے والے اجلاس میں شرکت کے حوالے سے فیصلہ تمام اسٹیک ہولڈرز سے مشاورت کے بعد لیا جائے گا۔