مسلم لیگ ن کی چیف آرگنائزر اور سینئر نائب صدر مریم نواز نے کہا ہے کہ مسلم لیگ ن وہ واحد جماعت ہے جو ملک و قوم کی وسیع خدمت کا جذبہ رکھتی ہے۔

تفصیلات کے مطابق مسلم لیگ ن کی چیف آرگنائزر اور سینئر نائب صدر مریم نواز شریف مرکزی سیکرٹریٹ ماڈل ٹاؤن گئیں اور وہاں رکن قومی اسمبلی علی زاہد، سابق رکن قومی اسمبلی طلال چوہدری، سعدیہ تیمور اور عظمٰی کاردار سے  ملاقات کی۔

اس موقع پر مریم نواز شریف کی زیر صدارت وومن ونگ، سوشل میڈیا اور یوتھ افیرز کو بہتر کرنے کے لئے میٹنگز کا انعقاد کیا گیا۔

مریم نواز شریف نے  سوشل میڈیا ٹیم کے اجلاس کی صدارت کرتے ہوئے ارکان سے کہا پاکستان کو جدید ترقی یافتہ اور فلاحی ریاست بنانے کے لیے کام کرنا آج ہماری ذمہ داری ہے۔

انہوں نے کہا کہ ہمارے سینئرز نے نواز شریف کی قیادت میں پاکستان میں تعمیر و ترقی کے نئے معیار قائم کیے اور اب اس ذمہ داری کو نبھانے کے لیے نوجوانوں اور خواتین بھی اپنا کردار ادا کرنے کے لیے کمر کس رہے ہیں کہ اس پرچم کو بلند رکھنے کا سبق اور تربیت ہمیں ہمارے بزرگوں سے ملی ہے۔

ان کا کہنا تھا کہ مسلم لیگ ن وہ واحد جماعت ہے جو ملک و قوم کی وسیع خدمت کا جذبہ رکھتی ہے۔

یہ بھی پڑھیں؛ مریم نواز کے ملک گیر تنظیمی دوروں کا شیڈول جاری

اس موقع پر پریم نواز نے نے سوشل میڈیا ٹیم کو تلقین کی کہ وہ اپنی ٹیم میں وسعت پیدا کریں اور جدید خطوط پر سوشل میڈیا کے تمام پلیٹ فارم کو پارٹی پیغام پہنچانے کیلیے استعمال کریں۔

مریم نواز شریف نے خواتین ونگ کو زیادہ بہتر کرنے کے لئے تجاویز بھی مرتب کیں۔

انہوں نے کہا کہ خواتین نے ہمیشہ پاکستان مسلم لیگ ن کی جیت میں نمایاں کردار ادا کیا ہے اور اب بھی خواتین اپنا کردار ادا کریں گی۔

یہ بھی پڑھیں؛ نواز شریف کو ملک سے نکالنا قومی سانحہ تھا، مریم نواز

اس موقع پر  مریم نواز شریف نے یوتھ ونگ کی کارکردگی کو سراہا اور اسے مزید متحرک کرنے کیلیے تجاویز مرتب کیں۔

مسلم لیگ ن کی چیف آرگنائزر اور سینئر نائب صدر مریم نواز شریف نے کہا کہ یوتھ ونگ نے ہمیشہ پارٹی کی ریڑھ کی ہڈی کا کردار ادا کیا ہے، آج اسمبلی میں بہت سے نمائندے مرکز اور صوبوں میں کردار ادا کررہے ہیں اور آئندہ بھی نوجوانوں کو زیادہ سے زیادہ نمائندگی ملے گی۔