اسلام آباد: صدر مملکت ڈاکٹر عارف علوی کی جانب سے پاکستان، قازقستان تجارتی و معاشی تعلقات بڑھانے کی ضرورت پر زور دیا گیا ہے۔
تفصیلات کے مطابق صدر عارف علوی سے قازقستان میں پاکستان کے نامزد سفیر نعمان بشیر بھٹی کی ملاقات ہوئی ہے۔
ملاقات کے دوران صدر مملکت نے گفتگو کرتے ہوئے کہا کہ دونوں ممالک کے مابین تجارت اور معیشت کے شعبے میں تعاون بڑھانے کی گنجائش موجود ہے، دونوں ممالک کے مابین دوطرفہ تجارت کی صلاحیت موجودہ سطح سے کہیں زیادہ ہے۔
عارف علوی نے کہا کہ دونوں ممالک کے مابین تجارتی حجم بڑھانے کیلئے نئی راہیں تلاش کرنا ہوں گی، زراعت اور زرعی مصنوعات کے شعبے میں تجارت کی صلاحیت کو عملی شکل دینا ہوگی۔
انکا کہنا ہے کہ قازقستان کے سرمایہ کاروں کو پاکستان کے خصوصی اقتصادی زونز میں سرمایہ کاری کیلئے زیادہ سے زیادہ سہولت فراہم کی جائے۔
صدر نے کہا کہ پاکستان قازقستان کے ساتھ اپنے تعلقات کو خصوصی اہمیت دیتا ہے، دونوں ممالک کے مابین تاریخی اور ثقافتی تعلقات ہیں۔
انہوں نے کہا کہ پاکستان وسطی ایشیائی ممالک کے ساتھ پائیدار اور بامعنی تعلقات کا خواہاں ہے، وسطی ایشیائی ممالک کے ساتھ روابط بڑھانا پاکستان کی خطے کی جانب پالیسی کا اہم حصہ ہے۔
صدر کا قازقستان کیساتھ عوامی تعلقات میں اضافے پر بھی زور
دوسری جانب صدر مملکت نے قازقستان کے ساتھ عوامی تعلقات میں اضافے کی ضرورت پر بھی زور دیا۔
عارف علوی نے کہا کہ اعلیٰ تعلیم کے شعبے میں جائنٹ ڈگریاں اور وفود کے تبادلوں کی ضرورت ہے، پاکستان کی ورچوئل یونیورسٹی آن لائن تعلیم کی سہولت فراہم کرتی ہے۔
یہ بھی پڑھیں: پاکستان کا قازقستان کے ساتھ سیاحت کے شعبے میں تعاون کیلئے ایم او یو کا فیصلہ
انہوں نے کہا کہ قازقستان کے طلباء ورچوئل یونیورسٹی کی آن لائن تعلیمی سہولت سے استفادہ کر سکتے ہیں، 8 ہزار کے قریب غیر ملکی طلباء یونیورسٹی کے ورچوئل تعلیمی پروگراموں سے استفادہ کر رہے ہیں۔
انکا کہنا ہے کہ نامزد سفیر سیلاب کے دوران پاکستان کی امداد پر قازقستان کے لوگوں اور حکومت کا شکریہ ادا کریں، نامزد سفیر بھارت کی مسلمان اور اقلیت مخالف پالیسیوں کا بھی پرچار کریں۔
صدر مملکت نے مزید کہا کہ بھارتی مقبوضہ جموں و کشمیر میں مسلمانوں کے خلاف ظلم اور انسانی حقوق کی خلاف ورزیوں کو اجاگر کریں۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News