پاکستان انفارمیشن سینٹر کوئٹہ  کے زیر اہتمام ہائبرڈ وار اور فیک نیوز سے بچنے اور نمٹنے کیلئے صحافیوں اور شعبہ ابلاغیات کے طلباء کیلئے تربیتی ورکشاپ کا انعقاد کیا گیا ہے۔

تفصیلات کے مطابق منسٹری آف انفارمیشن اینڈ براڈ کاسٹنگ کے زیلی ادارے پاکستان انفارمیشن سینٹر کوئٹہ کے زیر اہتمام نیوز ایتھینٹیسیٹی ٹولز ٹو کاونٹر فیک نیوز اینڈ اینٹی اسٹیٹ پروپیگنڈہ کے عنوان سے دو روزہ تربیتی ورکشاپ کا انعقاد کیا گیا جس میں نوجوان اور سینیر صحافیوں سمیت سوشل میڈیا ایکٹوسٹس نے حصہ لیا۔

دو روزہ ورکشاپ میں فیک نیوز کے حوالے سے تفصیلی لیکچرز فراہم کیے گئے جبکہ شرکاء کو بتایا گیا کہ کن ٹولز کو استعمال کرتے ہوئے غلط معلومات کا تدارک کیا جا سکتا ہے۔

ورکشاپ کی اختتامی تقریب سے خطاب کرتے ہوئے سینیر صحافی و تجزیہ کار شہزادہ ذولفقار نے کہا کہ فیک نیوز موجودہ دور کا ایک سب سے بڑا چیلنج ہے اس کے تدارک کی زمہ داری ہم سب پر عائد ہوتی ہے۔

ان کا کہنا تھا کہ ایک صحافی کے لیے ضروری ہے کہ  وہ  فیکٹ چیکنگ   اور خبر کی درستگی سے متعلق دوسرے سورسز سے بھی توثیق کرے۔

انہوں نے کہا کہ پی آئی سی کی جانب سے فیک نیوز کے موضوع پر ٹریننگ کا اہتمام ایک بہترین قدم ہے، مستقبل میں اس طرح کے مزید  ٹریننگ سیشنز منعقد کروانے کی ضرورت ہے۔

ڈائریکٹر پبلک ریلیشن اینڈ ریجنل انفارمیشن آفیسر پی آئی ڈی عبدالمنان نے بھی ورکشاپ سے خطاب کیا ورکشاپ کے آخر میں شرکاء میں سرٹیفیکیٹس اور شیلڈز تقسیم کی گئیں۔