گورنر پنجاب نے کہا ہے کہ عوام کی فلاح و بہبود اور انہیں زیادہ سے زیادہ ریلیف فراہم کرنا حکومت کا بنیادی مقصد ہے۔

تفصیلات کے مطابق گورنر پنجاب محمد بلیغ الرحمن سے وفاقی وزیر برائے ریلویز اینڈ ایوی ایشن خواجہ سعد رفیق کی گورنر ہاؤس میں ملاقات ہوئی ہے۔

مالاقات میں خواجہ سعد رفیق نے کہا کہ ریلوے اور پی آئی کو بین الاقوامی سطح پر لانے کے لئے ٹھوس اقدامات کئے جارہے ہیں جبکہ ایوی ایشن، پی آئی اے اوریلویزمیں عوام کو بہترسفری سہولیات فراہم کرنے کے لئے تمام تر وسائل کو یقینی بنایا جارہا ہے۔

وفاقی وزیر خواجہ سعد رفیق  نے مزید کہا کہ پی آئی اے کے اندر بہت بہتری لائی جا رہی ہے، جہازوں کی حالت بہتر بنانے کے ساتھ ساتھ جہازوں کے روٹس میں اضافہ کیا جا رہا ہے جبکہ ریلوے اسٹیشنوں کی حالت بہتر بنائی جا رہی ہے اور عوام کے لیے ریلوے کے سفر کو آرام دہ بنانے کے لیے بھی اقدامات اٹھائے جا رہے ہیں۔

اس موقع پر گورنر پنجاب محمد بلیغ الرحمن نے کہا کہ حکومت مشکل حالات کے باوجود ملکی معیشت سمیت ہر شعبے میں بہتری لانے کے لئے ہر ممکن اقدمات اٹھارہی ہے، عوام کی فلاح و بہبود اور انہیں زیادہ سے زیادہ ریلیف فراہم کرنا حکومت کا بنیادی مقصد ہے۔

محمد بلیغ الرحمن نے کہا کہ کم آمدنی والے گھرانوں کے لئے مفت آٹا فراہم کرنا حکومت کی جانب سے احسن اقدام ہے، عوامی خدمت کا سفر جاری رکھیں گے۔

انہوں نے یہ بھی کہا کہ پاکستان کو مضبوط اور خوشحال بنانا ہم سب کی ذمہ داری ہے جس کے لئے سب کو چاہئے کہ وہ ملک کی تعمیر و ترقی میں مثبت کردار ادا کرے۔

گورنر پنجاب محمد بلیغ الرحمن  نے مزید کہا کہ وفاقی حکومت کے عوام کو بہتر سفری سہولیات فراہم کرنے کے لئے کئے گئے اقدامات قابل تعریف ہیں۔