اسلام آباد: صدر مملکت ڈاکٹر عارف علوی نے کہا ہے کہ ملک بھر سے دہشتگردی اور انتہا پسندی کا مکمل خاتمہ ناگزیر ہے۔

تفصیلات کے مطابق صدر مملکت ڈاکٹر عارف علوی نے گورنر خیبر پختونخوا سے ٹیلی فون پر باجوڑ دھماکے پر تعزیت کا اظہار کیا۔

صدر مملکت نے باجوڑ دھماکے میں قیمتی جانی نقصان پر گورنر اور خیبر پختونخوا کی عوام سے افسوس کا بھی اظہار کیا اور کہا کہ خیبر پختونخوا کی عوام نے دہشت گردی کے خلاف بڑی قربانیاں دیں۔

انہوں نے کہا کہ ہمارا مذہب ایسی مذموم کارروائیوں، دہشت گرد حملوں کی اجازت نہیں دیتا، ملک بھر سے دہشتگردی اور انتہا پسندی کا مکمل خاتمہ ناگزیر ہے۔

عارف علوی نے مزید کہا کہ دہشت گرد ملک اور قوم کے دشمن ہیں، ناپاک عزائم میں کامیاب نہیں ہوں گے۔

صدر مملکت نے دھماکے میں جاں بحق ہونے والوں کے ورثاء سے ہمدردی کا اظہار کیا اور زخمیوں کی جلد صحتیابی کی دعا کی۔

واضح رہے کہ باجوڑ دھماکے کے مزید 11 زخمی دم توڑ گئے جس کے بعد جاں بحق افراد کی تعداد 54 تک پہنچ گئی ہے۔

اس حوالے سے ایڈیشنل آئی جی سی ٹی ڈی شوکت عباس نے بول نیوز سے خصوصی گفتگو کرتے ہوئے کہا کہ باجوڑ خودکش دھماکے میں 54 افراد شہید اور 83 زخمی  ہوئے۔

ایڈیشنل آئی جی سی ٹی ڈی نے بتایا کہ جلسہ دو بجے شروع ہوا اور 4 بجکر 10 منٹ پر دھماکہ ہوا، جو خودکش دھماکہ تھا۔

شوکت عباس کا کہنا تھا کہ حملہ اور گروپ کی شناخت ہوئی ہے، دھماکہ کا کوئی خاص ٹارگٹ تھا، جائے وقوعہ سے بہت سارے شواہد ملے ہیں۔ جائے وقوعہ سے بال بیرنگ بھی ملے ہیں جبکہ خودکش دھماکے میں 10 سے 12 کلو گرام بارودی مواد استعمال ہوا ہے۔

ایڈیشنل آئی جی سی ٹی ڈی نے مزید کہا کہ ابتدائی انکوائری میں ملزمان تک تقریباً پہنچ چکے ہیں، فرانزک رپورٹس آنے کا انتظار ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں