لاہور: پاکستان مسلم لیگ ن کے قائد نواز شریف کی جاتی امرا میں اہم مصروفیات جاری ہیں۔

پارٹی ذرائع کے مطابق مسلم لیگ ن بلوچستان کی قیادت سابق وزیراعظم نواز شریف سے ملاقات کے لئے جاتی امرا پہنچ گئی ہے، مسلم لیگ ن بلوچستان کے صدر جعفر خان مندوخیل اور سابق وزیراعلیٰ بلوچستان ڈاکٹر محمد مالک بھی جاتی امرا میں موجود ہیں۔

اس کے علاوہ مسلم لیگ ن کے رہنما میر کبیر، سردار کمیل، عمر جان محمد، طاہر خان بزنجو اور مسلم لیگ ن کے بلوچستان کے لئے نامزد کوآرڈینیٹر سردار ایاز صادق بھی جاتی امراء پہنچ گئے۔

ذرائع نے مزید بتایا ہے کہ مسلم لیگ ن کے قائد نواز شریف کو بلوچستان میں انتخابی مہم کے بارے میں بریفگ دی جائے گی اور مسلم لیگ ن بلوچستان میں انتخابی مہم کے بارے میں تفصیلی تبادلہ خیال اور آئندہ کا لائحہ عمل طے کیا جائے گا۔

دوسری جانب عام انتخابات کے پیش نظر مسلم لیگ ن کے قائد نواز شریف اور چیف آرگنائزر مریم نواز طوفانی دورے شروع کرنے جارہے ہیں۔

 مسلم لیگ ن نے انتخابی جلسوں کے پروگرام کو حتمی شکل دے دی ہے جس میں بتایا گیا ہے کہ میاں نواز شریف 20 جنوری کو لیہ میں جلسہ سے خطاب کریں گے اور 22جنوری کو مانسہرہ میں جلسہ سے خطاب کریں گے۔

ذرائع ن لیگ نے بتایا کہ سابق وزیراعظم میاں نواز شریف 24 جنوری کو ننکانہ صاحب، 26 جنوری کووہاڑی، 28جنوری کو کراچی اور 30جنوری کو بہاولپورمیں جلسے سے خطاب کریں گے۔

ذرائع نے مزید بتایا کہ مریم نواز شریف 15 جنوری کو اوکاڑہ، 19 جنوری کو خانیوال، 23 جنوری کو مری اور 25 جنوری کو پشاور اور حویلیاں میں جلسے سے خطاب کریں گی۔