مشیر خزانہ خیبرپختونخوا مزمل اسلم نے کہا ہے کہ خیبرپختونخوا 93 فیصد اخراجات کیلئے وفاق پر انحصار کرتا ہے۔

کیپرا سیلز ٹیکس ان سروسز ایکٹ 2022 خیبرپختونخوا قواعد و ضوابط پر مشاورتی اجلاس ہوا جس میں وکلاء، ماہرین ٹیکس، سرکاری افسران اور وید ہولڈنگ ایجنٹس کے علاوہ چیمبر آف کامرس کے نمائندوں نے شرکت کی۔

اس موقع پر ڈی جی کیپرا کو وومن ڈیسک بنانے کی ہدایات جاری کر دی گئیں۔

مشیر خزانہ مزمل اسلم نے خیبرپختونخوا ریونیو اتھارٹی کے مشاورتی اجلاس سے خطاب کرتے ہوئے کہا کہ شادی ہال اور ریسٹورنٹ پر 10 فیصد ٹیکس کی بجائے فیکس ٹیکس لگائیں گے، تمام شادی ہالز اور ریسٹورنٹس کو رجسٹرڈ کریں گے۔

انہوں نے کہا کہ خواتین کے کاروبار کو وسعت اور ٹیکس نرخ کم کریں گے، مقامی ٹیکس آمدنی میں ہر صورت اضافہ کریں گے۔

مشیر خزانہ کا کہنا تھا کہ خیبرپختونخوا میں سیاحت سمیت متعدد شعبوں پر ٹیکس صفر ہے، خیبرپختونخوا میں آبادی کے تناسب ٹیکس بہت کم ہے۔

مزمل اسلم نے کہا کہ پراپرٹی ٹیکس 23 فیصد زیادہ ہے جس کی وجہ سے لوگ اسٹامپ پیپرز پر زمین کی ٹرانسفر کرتے ہیں، 23 فیصد پراپرٹی ٹیکس میں سے 6 فیصد صوبے کو باقی وفاق کو جاتا ہے۔

انہوں نے مزید کہا کہ آبادی کے تناسب سے صوبے میں ٹیکس کلیکشن بہت کم ہے، خیبرپختونخوا 93 فیصد اخراجات کیلئے وفاق پر انحصار کرتا ہے، ساڑھے چھ فیصد صوبے کی اپنی آمدنی ہے۔