اسلام آباد: وزیر خزانہ محمد اورنگزیب نے کہا ہے کہ ٹیکسوں سے متعلق مقدمات کو ٹریبونلز کے زریعہ جلد نمٹانا چاہتے ہیں۔

وفاقی وزیر اورنگزیب نے اٹلانٹک کونسل سے خطاب کرتے ہوئے کہا کہ آئی ایم ایف مشن کے ساتھ گزشتہ بات چیت مثبت اور تعمیری رہی ہے، ہم باہمی اعتماد کے ساتھ آگے بڑھنا چاہتے ہیں۔

انہوں نے کہا کہ ایس بی اے پروگرام کے حوالہ سے پاکستان نے تمام نکات پر عمل درآمد کیا ہے، قلیل المدت بنیادوں پرٹیکس لیکجز کو بند کرنا چاہتے ہیں۔

اورنگزیب نے مزید کہا کہ ٹیکسوں سے متعلق مقدمات کو ٹریبونلز کے ذریعے جلد نمٹانا چاہتے ہیں، ٹیکس کی بنیاد اور دائرہ کار میں توسیع ہماری ترجیحات میں شامل ہے، صنعت، خدمات، ریٹیل اورزراعت کا جی ڈی پی میں جو حصہ ہے اسی تناسب سے ٹیکسوں کاتناسب نہیں۔

اعلامیہ جاری

آئی ایم ایف مشن کے ساتھ گزشتہ بات چیت کا اعلامیہ جاری کردیا گیا ہے کہ جس میں بتایا گیا ہے کہ وزیر خزانہ نے معاشی چیلنجز سے نمٹنے کیلئے پاکستان کے روڈ میپ سے آگاہ کیا اور ٹیکس ٹو جی ڈی پی تناسب میں اضافہ اور ایف بی آر ڈیجٹلائزیشن کا خاکہ پیش کیا۔

اس کے علاوہ وزیر خزانہ نے ایس او ایز میں اصلاحات اور برآمدات میں اضافے کا خاکہ پیش کیا اور ترسیلات زر میں اضافے اور کاروباری ماحول کو بہتر بنانے کا خاکہ بھی پیش کیا گیا۔

اعلامیے میں مزید بتایا گیا کہ بیرونی سرمایہ کاری کے فروغ کے ذریعے معاشی استحکام کا روڈمیپ پیش کیا گیا اور معاشی استحکام کیلئے حکومت کے کلیدی اقدامات پر بھی روشنی ڈالی گئی۔