اسلام آباد: وفاقی وزیر خزانہ محمد اورنگزیب نے کہا ہے کہ آئی ایم ایف سے قرض توسیع پروگرام پر بات چیت کا پلان ہے۔

وزیر خزانہ اورنگزیب نے فرانسیسی خبر رساں ادارے اے ایف پی کو انٹرویو دیتے ہوئے کہا کہ آئی ایم ایف کے ساتھ اربوں ڈالر کے نئے قرضے کے معاہدے پر بات چیت کا پلان ہے، نیا قرض پروگرام پاکستان کی اقتصادی ترقی کیلئے اصلاحاتی ایجنڈے کے تحت ہوگا۔

انہوں نے کہا کہ پہلے معاہدے کی 1.10 ڈالر کی حتمی قسط اس ماہ کے آخر میں منظور ہونے کا امکان ہے، رواں سال پاکستان کی اقتصادی صورتحال بہتر رہی، پاکستان میں مارکیٹ کا اعتماد بحال ہوا ہے۔

محمد اورنگزیب نے کہا کہ آئی ایم ایف کے ساتھ نو ماہ کے ایک پروگرام کو کامیابی سے مکمل کیا، ترقی اور معیشت میں بہتری کی رپورٹس عالمی ادارے دے رہے ہیں۔

وزیر خزانہ کا کہنا تھا کہ اصلاحاتی ایجنڈے کے تحت خسارے والے اداروں کی نجکاری کر رہے ہیں، پی آئی اے کی نجکاری کا مرحلہ جون تک مکمل کر لیا جائے گا۔

انہوں نے کہا کہ ٹیکس وصولیوں میں اضافے کے لیے اقدامات کر رہے ہیں، حکومت اصلاحاتی ایجنڈے کو آگے بڑھائے گی۔

محمد اورنگزیب نے مزید کہا کہ نجی شعبے میں تجربے کو معاشی استحکام کے لیے بروئے کار لائیں گے، پاکستان کی ترقی کیلئے انویسٹمنٹ ٹو جی ڈی پی کو بھی 15 فیصد تک لے جانا ہوگا۔