لاہور: پنجاب میں رئیل سٹیٹ انویسٹمنٹ ٹرسٹ کے قیام کے لئے قانون سازی کا فیصلہ کر لیا گیا۔

وزیراعلیٰ پنجاب مریم نواز شریف کی زیر صدارت اہم اجلاس منعقد ہوا جس میں پنجاب سینٹرل بزنس ڈسٹرکٹ اتھارٹی کے پراجیکٹس سے متعلق تفصیلی بریفنگ دی گئی۔

اجلاس میں آئی ٹی سٹی کے لئے چین، جنوبی کوریا اور سعودی عربین کمپنیوں سے ڈیل فائنل کرنے کی ہدایت دی گئی اور سی بی ڈی پراجیکٹ پر سال بہ سال ٹارگٹ مکمل کرنے اور پیش رفت کی رپورٹ پیش کرنے کی بھی ہدایت دی گئی۔

اجلاس کے دوران پنجاب کے آٹھ شہروں میں سی بی ڈی بزنس سنٹرز قائم کرنے پر بھی اتفاق کیا گیا اور سیالکوٹ میں سٹی آف سپورٹس قائم کرنے کی تجویز دی گئی اور کہا گیا کہ اسٹیڈیم بھی بنایا جائے گا۔

دوران اجلاس آئی ٹی سٹی میں سلیکون کلسٹرپر پیشرفت کا جائزہ بھی لیا گیا اور پنجاب میں رئیل اسٹیٹ انویسٹمنٹ ٹرسٹ کے قیام کے لئے قانون سازی کا فیصلہ کیا گیا۔

وزیر اعلیٰ مریم نواز شریف کو فیروز پور روڈ پر گرینڈ سوک لاہور کے قیام کے بارے میں تفصیلی بریفنگ دی گئی۔

بریفنگ میں بتایا گیا کہ لاہور کلمہ چوک پر سی بی ڈی گرینڈ سنٹرل سٹیشن قائم ہوگا اور گرینڈ سوک میں 600 شاپس اور ریسٹورنٹس قائم ہوں گے، سی بی ڈی مین بلیوارڈپر ماحول دوست بلیو روڈز بنائے گی۔

دوران اجلاس سی بی ڈی کے چیف ایگزیکٹو آفیسر عمران امین نے قائد ڈسٹرکٹ، باب ڈسٹرکٹ اور پنڈی ڈسٹرکٹ کے بارے میں جائزہ رپورٹ پیش کی۔

واضح رہے کہ اجلاس میں سینیٹر پرویز رشید، سینئرصوبائی وزیرمریم اورنگزیب، صوبائی وزیر اطلاعات و ثقافت عظمیٰ زاہد بخاری، ایم پی اے ثانیہ عاشق، معاون خصوصی ذیشان ملک، چیف سیکریٹری، چیئرمین پی اینڈ ڈی، سی او او بریگیڈئرمنصور جنجوعہ، سیکریٹری فنانس، پرنسپل سیکریٹری اور دیگر حکام موجود تھے۔