اسلام آباد: وزیراعظم شہباز خصوصی دعوت پر متحدہ عرب امارات کا دورہ کریں گے۔

ترحمان دفتر خارجہ کے مطابق متحدہ عرب امارات کے نائب صدر، وزیراعظم اور دبئی کے حکمران شیخ محمد بن راشد المکتوم کی دعوت پر وزیراعظم شہباز شریف متحدہ عرب امارات کا دورہ کریں گے۔

دفتر خارجہ نے بتایا کہ وزیراعظم شہباز شریف 10 اور 11 فروری کو دبئی میں ورلڈ گورنمنٹس سمٹ میں شرکت کریں گے، ورلڈ گورنمنٹس سمٹ میں دنیا بھر سے سربراہان حکومت و مملکت، پالیسی میکرز اور بڑی کاروباری شخصیات شریک ہوں گی۔

ترجمان کا کہنا ہے کہ سمٹ کا موضوع گورننس، اختراعات اور بین الاقوامی اشتراک کار ہیں جب کہ مارچ 2024 میں عہدہ سنبھالنے کے بعد یہ وزیراعظم شہباز شریف کا متحدہ عرب امارات کا دوسرا دورہ ہوگا۔

ترجمان نے یہ بھی بتایا کہ وزیراعظم کے ساتھ اعلی سطح کے وفد میں نائب وزیراعظم اسحاق ڈار اور دیگر اہم وزراء شامل ہوں گے، وزیراعظم کا دورہ پاکستان اور متحدہ عرب امارات کے تعلقات اور دیگر عالمی شراکت داروں کے ساتھ روابط کا مظہر ہے۔

دفتر خارجہ نے کہا کہ وزیراعظم شہباز شریف ڈبلیو جی ایس سے کلیدی خطاب کریں گے اور وزیراعظم اقتصادی ترقی، ڈیجیٹل ٹرانسفارمیشن اور حکومتی اصلاحات کے حوالے سے پاکستان کا ویژن پیش کریں گے۔

دفتر خارجہ نے مزید بتایا کہ وزیراعظم کی متحدہ عرب امارات کی قیادت کے ساتھ دو طرفہ ملاقاتیں بھی ہوں گی جب کہ وزیراعظم شہباز شریف سمٹ میں شریک دیگر ممالک کے سربراہان مملکت و حکومت اور ملٹی نیشنل کمپنیز کے سی ای او سے بھی ملاقاتیں کریں گے۔