جنگ، عالمی وباء اور سست رفتار مارکیٹ نے اس سال دنیا کے ارب پتی افراد کو شدید نشانہ بنایا۔ فوربس کی جانب سے جاری کی جانے والے ارب پتی افراد کی 36 ویں سالانہ فہرست میں 2668 افراد دنیا کے امیر ترین افراد قرار پائے جس گزشتہ برس کی نسبت 87 افراد کم ہیں۔

یہ تمام افراد مجموعی طور پر 12 ہزار 700 ارب ڈالرز کی مالیت رکھتے ہیں جو 2021 کی نسبت 400 ارب ڈالرز کم ہے۔

ارب پتی افراد میں ڈرامائی کمی روس میں آئی ہے جہاں یوکرین پر کیے جانے والے حملے کی وجہ سے گزشتہ برس کی نسبت 34 ارب پتی افراد کم ہیں۔ جبکہ چین میں حکومت کی جانب سے ٹیک کمپنیوں پر کیے جانے والے کریک ڈاؤن کی وجہ سے فہرست میں 87 چینی ارب پتی افراد کم ہو گئے ہیں۔

تاہم، اس کے باوجود فوربس کو 1000 افراد ایسے ملے جو گزشتہ برس کی نسبت اس سال زیادہ امیر تھے۔

جبکہ اس ایک سال کے عرصے میں اس فہرست میں 236 نئے افراد شامل ہوئے ہیں۔

امریکا سب سے زیادہ 735 ارب پتی افراد کے ساتھ سرِ فہرست ہے۔

جبکہ چین 607 ارب پتی افراد کے ساتھ دوسرے نمبر پر ہے۔

فہرست کے مطابق ٹیسلا کے مالک ایلون مسک 219 ارب ڈالرز کے ساتھ پہلے نمبر پر، ایمازون کے مالک جیف بیزوس 171 ارب ڈالرز کے ساتھ دوسرے نمبر پر، برنرڈ آرنلٹ اینڈ فیملی 158 ارب ڈالرز کے ساتھ تیسرے اور مائیکروسافٹ کے بانی بِل گیٹس 129 ارب ڈالرز کے ساتھ چوتھے نمبر پر ہیں۔