ویمنز ٹی ٹوئنٹی ورلڈکپ 2020 کا فائنل میچ دیکھنے والے تماشائی میں کورونا وائرس کی تشخیص ہوگئی۔
امریکی اسپورٹس نیوز ویب سائٹ کرک انفو کی رپورٹ کے مطابق گذشتہ اتوار کومیلبرن کرکٹ گراؤنڈ ( ایم سی جی) میں ٹی ٹوئنٹی ورلڈکپ کے فائنل میں شرکت کرنے والے ایک مداح کےکورونا وائرس کا ٹیسٹ مثبت آیا ہے۔
کورونا وائرس سے متاثرہونے والا مداح اسٹیڈیم کے ناردرن اسٹینڈ پر بیٹھا تھا۔
میلبورن کرکٹ کلب (ایم سی سی) کی ویب سائٹ پر جاری بیان میں کہا گیا کہ کلب اس بات سے آگاہ ہےکہ اتوار 8 مارچ کو ایم سی جی میں آئی سی سی ویمنز ٹی 20 ورلڈ کپ کے فائنل میں شرکت کرنے والے ایک شخص میں وائرس کی تشخیص ہوئی ہے۔
محکمہ صحت (ڈی ایچ ایچ ایس) کی جانب سے جاری بیان میں کہا گیا ہے کہ متاثرہ شخص کے آس پاس بیٹھے لوگوں میں وائرس پھیلنے کا خطرہ کم ہے۔
ڈی ایچ ایچ ایس نے کہا ہے کہ وہ لوگ جو متاثرہ شخص کے آس پاس بیٹھے تھے وہ اپنے معمول کے روٹین پر چلیں تاہم حفظان صحت کے اقدامات پر زیادہ توجہ دیں اور فلو نما علامات سامنے آنے پر فوری ڈاکٹر سے رجوع کریں۔
واضح رہے کہ ویمنز ٹی ٹوئنٹی ورلڈکپ کا فائنل میچ اتوار 8 مارچ کو آسٹریلیا اور بھارت کے درمیان میلبرن کرکٹ گراؤنڈ میں کھیلا گیا تھا جسے دیکھنے کے لیے 86،174 شائقین اسٹیڈیم آئے تھے۔
خواتین کے کھیلوں کے ایونٹ کےکسی بھی مقابلے میں شائقین کی یہ دوسری بڑی تعداد ہے۔ سب سے زیادہ شائقین کا ریکارڈ 1999 میں خواتین کےفیفا ورلڈ کپ فائنل کے دوران قائم ہوا تھا جس میں 90،815 شائقین نے شرکت کی تھی۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News