ملتان کرکٹ اسٹیڈیم میں شائقین کرکٹ جعلی ٹکٹس پر اسٹیڈیم پہنچ گئے جبکہ انتظامیہ اور دیگر ادارے جعلی ٹکٹوں کی فروخت روکنے میں ناکام رہی۔

نجی خبر رساں ادارے کی رپورٹ کے مطابق پاکستان اور ویسٹ انڈیز کے درمیان تیسرے اور آخری ون ڈے میچ میں جعلی ٹکٹوں کی فروخت کا انکشاف ہوا ہے۔

رپورٹ کے مطابق جعلی ٹکٹیں رکھنے والوں کو ہدایت کی گئی تھی کہ وہ رش کے وقت داخل ہوں جس میں ٹکٹس مافیا کامیاب بھی رہا کیونکہ جیسے ہی رش بڑھا تو انتظامیہ نے اسکیننگ بند کردی جس کے باعث ہزاروں کی تعداد میں جعلی ٹکٹس رکھنے والے افراد بھی اسٹیڈیم میں داخل ہوگئے۔

بعد ازاں جب اصل ٹکٹوں والے اسٹیڈیم پہنچے تو انہیں اندر داخل ہونے میں شدید مشکلات کا سامنا کرنا پڑا جبکہ کئی افراد تو دھکم پیل کے بعد واپس اپنے گھروں کو بھی روانہ ہوگئے۔

دوسری جانب تیسرے ون ڈے میں ٹکٹوں کی بلیک میں فروخت کا سلسلہ بھی عروج پر رہا اور مافیا کھلے عام شائقین کرکٹ کو لوٹتا رہا جس کے سامنے انتظامیہ بھی بے بس دکھائی دی۔

واضح رہے کہ 14 سال بعد ملتان کرکٹ اسٹیڈیم میں پاکستان اور ویسٹ انڈیز کی ٹیموں کے درمیان بین الاقوامی تین ون ڈے میچز پر مشتمل سیریز کھیلی گئی جس میں پاکستان نے ویسٹ انڈیز کو کلین سوئپ کردیا۔

سیریز کے پہلے میچ میں پاکستان نے 5 وکٹوں سے کامیابی اپنے نام کی جبکہ دوسرے میچ میں پاکستان نے 120 رنز کے بڑے مارجن سے کالی آندھی کو چت کیا اور تیسرے میچ میں پاکستان نے 53 رنز سے کامیابی سمیٹی۔

سیریز کے بہترین کھلاڑی کا اعزاز امام الحق کے نام رہا جنہوں نے لگاتار تینوں اننگز میں نصف سنچریاں اسکور کی تھیں، پہلے میچ میں 65، دوسرے میں 72 اور تیسرے میں 62 رنز کے ساتھ سیریز میں نمایاں رہے تھے۔