پاکستان کے سابق اوپنر کھلاڑی مدثر نذر نے بابر اعظم کے دوبارہ کپتان بننے کی پیش گوئی کر دی ہے۔
تفصیلات کے مطابق سابق کپتان مدثر نذر نے دبئی میں بول نیوز کے نمائندے اعجاز وسیم باکھری کے ساتھ خصوصی گفتگو میں کہا کہ بابر اعظم مستقبل میں دوبارہ قومی کرکٹ ٹیم کے کپتان بن سکتے ہیں۔
سابق ٹیسٹ کرکٹر اور یو اے ای ٹیم کے ہیڈکوچ مدثر نذر نے کہا کہ یو اے ای کی کرکٹ ٹیم سخت ٹریننگ کر رہی ہے اور یہ ٹیم مستقبل میں بڑی ٹیموں کو شکست دے گی
ایک سوال کے جواب میں مدثر نذر نے کہا کہ قومی کرکٹ ٹیم اگر آسٹریلیا کو اس کی سرزمین پر شکست دینا چاہتی ہے تو باؤلرز کو کردار ادا کرنا پڑے گا۔
مدثر نذر نے کہا کہ پاکستان پیس بیٹری کے اہم رکن شاہین شاہ آفریدی کے کندھوں پر بہت زیادہ ذمہ داری ہے اور انہیں نئی گیند سے آسٹریلوی کھلاڑیوں کی وکٹ لینا ہو گی۔
متحدہ عرب امارات کے ہیڈ کوچ کا کہنا تھا کہ اگر شاہین آفریدی کو نئی گیند پر وکٹیں نہ ملیں تو ٹیم کو مشکلات کا سامنا کرنا پڑ سکتا ہے کیونکہ ہمارا اسپن اٹیک بہت کمزور ہے۔
بابر اعظم کے حوالے سے مدثر نذر نے بول نیوز کے نمائندے اعجاز وسیم باکھری کو بتایا کہ بابر اعظم پر کپتانی نہ ہونے سے پریشر کم ہو گیا ہے، اب وہ اپنا نیچرل کھیل پیش کر سکتا ہے۔
مدثر نذر نے مزید کہا کہ بابر اعظم کے ورلڈ کلاس بیٹر ہونے میں کوئی شک نہیں ہے اس نے آسٹریلوی پچوں پر رنز اسکور کئے ہیں، اور امید ہے کہ وہ موجودہ سیریز میں رنز اسکور کرے گا۔
مدثر نذر کا کہنا تھا کہ بابر اعظم کے کندھوں پر چھوٹی عمر میں ہی قیادت کی ذمہ داری سونپ دی گئی تھی جو ظاہر ہے ایک دن واپس تو ہونا تھی۔
مدثر نذر نے ویرات کوہلی، سچن ٹنڈولکر، آئن بوتھم اور کپل دیو کی مثال دیتے ہوئے کہا کہ ان کھلاڑیوں کو کپتانی سے ہٹایا گیا تو انہوں نے کیرئیر کی بہترین کرکٹ کھیلی۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News