پی سی بی کی جانب سے ایشیا کپ جیتنے والی پاکستان وہیل چیئر کرکٹ ٹیم کے لیے 36 لاکھ روپے انعام کا اعلان کیا گیا ہے۔

پی سی بی مینجمنٹ کمیٹی کے چیئرمین  ذکاء اشرف نے نیپال میں منعقدہ ٹی ٹوئنٹی ایشیاکپ وہیل چیئر کرکٹ کی فاتح پاکستان وہیل چیئر ٹیم کو 36 لاکھ روپے کا نقد انعام دیا ہے۔

پاکستان وہیل چیئر کرکٹ ٹیم نے آل راؤنڈ کارکردگی کا مظاہرہ کرتے ہوئے وہیل چیئر کرکٹ ایشیاکپ ٹی ٹوئنٹی کپ میں لگاتار دوسری مرتبہ چیمپئن بننے کا اعزاز حاصل کیا ہے۔

پی سی بی کھیل کے ایک اہم حصے کے طور پر اس کامیابی کو نہ صرف سراہتا  ہے بلکہ ان تمام صلاحیتوں کے حامل افراد کو سپورٹ بھی کرتا ہے۔

اس موقع پر ذکا اشرف نے چیئرپرسن پاکستان وہیل چیئر کرکٹ رخسانہ راجپوت، منیجر زوار نور، اسسٹنٹ مینجر جاوید بابر اور کپتان محمد ذیشان سمیت فاتح اسکواڈ کو سراہا۔

پاکستان کرکٹ بورڈ کی مینجمنٹ کمیٹی کے چیئرمین ذکاء اشرف نے اس موقع پر اظہار خیال کرتے ہوئے کہا کہ وہ ایشیاکپ جیتنے والی ٹیم کو مبارکباد پیش کرتے ہیں۔

انہوں نے کہا ہم تمام کھلاڑیوں اور وہیل چیئر کرکٹ مینجمنٹ پر فخر محسوس کرتے ہیں جنہوں نے یہ کارنامہ انجام دیا۔ آپ تمام لوگ بے پناہ صلاحیتوں کے مالک ہیں اور دنیا بھر میں پاکستان کا نام روشن کررہے ہیں۔

ذکاء اشرف نے کہا کہ پاکستان کرکٹ بورڈ اس بات کو یقینی بنائے گا کہ پاکستان وہیل چیئر کرکٹ ٹیم کو زیادہ گراؤنڈز اور ٹریننگ کی سہولتیں فراہم کی جائیں۔

پاکستان کرکٹ بورڈ کے چیف آپریٹنگ آفیسر سلمان نصیر نے کہا کہ وہ پاکستان کرکٹ بورڈ کی طرف سے وہیل چیئر ٹیم کو مبارک باد پیش کرتے ہیں۔

انہوں نے مزید کہا آپ پاکستان کے سفیر ہیں اور ہمیں اس بات پر بہت زیادہ خوشی ہے کہ آپ نے اپنی حوصلہ مندی اور مہارت کا ثبوت پیش کرتے ہوئے ایشیاکپ کے ٹائٹل لگاتار دو مرتبہ جیتے ہیں۔