لاہور: پاکستان کرکٹ بورڈ (پی سی بی) نے کراچی اور مظفرآباد میں کرکٹ انفراسٹرکچر کو مضبوط بنانے کا فیصلہ کرلیا ہے۔

چیئرمین پاکستان کرکٹ بورڈ محسن نقوی کی زیر صدارت بورڈ آف گورنرز کا ویڈیو لنک اجلاس ہوا، جس میں کرکٹ کے انفراسٹرکچر اور ڈومیسٹک کرکٹ کے فروغ کے لیے اہم فیصلے کیے گئے۔

اجلاس میں نیشنل کرکٹ سٹیڈیم کراچی کی تعمیر نو کے دوسرے مرحلے کی منظوری دی گئی جبکہ ایل سی سی اے گراؤنڈ کو اوول گراؤنڈ کی طرز پر اپ گریڈ کرنے کا فیصلہ بھی منظور کیا گیا۔

پی سی بی کے اعلیٰ حکام نے پی ایس ایل لندن اور نیویارک روڈ شوز کی کامیابی پر چیئرمین محسن نقوی اور ٹیم کی محنت کو سراہا۔

اجلاس میں سری لنکن ٹیم کے حالیہ دورے کو جاری رکھنے میں چیئرمین کی ذاتی کوششوں کو بھی خراج تحسین پیش کیا گیا اور بورڈ کے ممبران نے اظہار تشکر کی قرارداد منظور کی۔

چیئرمین پی سی بی نے اجلاس میں کہا کہ سری لنکن ٹور کو جاری رکھنے کا کریڈٹ پوری ٹیم کو جاتا ہے، پی ایس ایل روڈ شوز کی کامیابی بھی ٹیم کی انتھک محنت کا نتیجہ ہے۔

انہوں نے مظفرآباد اسٹیڈیم میں پی ایس ایل 11 کے میچز اور مستقبل میں انٹرنیشنل میچز کروانے کے منصوبے کا اعلان بھی کیا۔

اجلاس میں بتایا گیا کہ اسلام آباد میں اسٹیٹ آف دی آرٹ کرکٹ اسٹیڈیم تعمیر کیا جائے گا اور ریجنل سطح پر کلبز کی اسکروٹنی کے اقدامات شروع ہو چکے ہیں۔

ڈومیسٹک کرکٹ کے ڈھانچے کو مضبوط بنانے اور نچلی سطح پر ٹورنامنٹس کی تعداد بڑھانے کے منصوبے پر بھی بریفنگ دی گئی۔