انٹرنیٹ ٹیکنالوجی کی دنیا کی سب سے بڑی کمپنی ’ایلفابیٹ ‘‘کے سربراہ اپنے عہدوں سے رضاکارانہ طور پر الگ ہوگئےہیں ۔

 غیر ملکی خبررساں ادارےکےمطابق انٹرنیٹ ٹیکنالوجی کی دنیا کی سب سے بڑی کمپنی ’ایلفابیٹ‘ جوکہ سرچ انجن گوگل سمیت یوٹیوب، جی میل اور اینڈرائڈ آپریٹنگ سسٹم کی فاؤنڈر کمپنی ہے، کےسربراہ 46 سالہ سرگی برن اور لیری پیج نے رضاکارانہ طور پر اپنے عہدوں سے استعفیٰ دے دیا ہے ۔

گوگل سرچ انجن کو بنانے والے اب لیری پیج اور سرگی برن  کی  جگہ گوگل کے سی ای او بھارتی نژاد امریکی ٹیکنالوجسٹ سندر پچائی ان کی ذمہ داریاں نبھائیں گے۔

گوگل کی جانب سےجاری کئے گئے بیان میں سرگی برن اور لیری پیج نے اعلان کیا کہ وہ اپنے عہدوں سے رضاکارانہ طور کمپنی کے بہتر مفاد میں الگ ہو رہے ہیں۔

دونوں کی جانب سے لکھے گئے خط میں کہا گیا کہ اب لیری پیج ’ایلفابیٹ‘ کمپنی کے سی ای او اور سرگی برن اسی ہی کمپنی کے صدر نہیں رہیں گے۔

ساتھ ہی دونوں نے اپنے خط میں اس عزم کا اظہار کیا کہ اگرچہ وہ دونوں اپنے عہدوں سے الگ ہو رہے ہیں، تاہم وہ کمپنی کی بہتری کے لیے ہر وقت ان عہدوں پر کام کرنے والے افراد کی مدد کے لیے تیار رہیں گے۔

خط میں مزید  بتایا گیا کہ لیری پیج اور سرگی برن اگرچہ سی ای او اور صدر کے عہدوں پر نہیں رہیں گے، تاہم دونوں کمپنی کے بورڈ آف ڈائریکٹرز کی کمیٹی میں شامل رہیں گے۔

 واضح  رہے کہ سرگی برن اور لیری پیج کی جانب سے اپنے عہدوں پر علیحدگی کا اعلان ایک ایسے وقت میں کیا گیا ہے جب کہ ’گوگل‘ پر پرائیویسی کے حوالے سے امریکا اور یورپ میں شدید تنقید کی جا رہی ہے اور ان کی کمپنی پر کروڑوں ڈالر کے جرمانے بھی عائد کیے جا چکے ہیں۔

خیال کیا جا رہا ہے کہ دونوں شریک سربراہوں کی جانب سے رضاکارانہ طور پر اپنے عہدوں سے علیحدگی کے بعد گوگل پر کی جانے والی تنقید میں کمی ہوگی۔

’  ایلفابیٹ‘ کمپنی کی تشکیل 2015 میں کی گئی تھی جب کہ اسی کمپنی کے سب سے معروف اور بڑے برانڈ ’گوگل‘ کو 1998 میں بنایا گیا تھا۔