دنیا کی سب سے بڑی انسٹنٹ میسیجنگ ایپلی کیشن واٹس ایپ کا اپنے صارفین کے لئے بہترین فیچر متعارف کروانے کا امکان ہے۔

تفصیلات کے مطابق واٹس ایپ کے مقبول فیچر چینلز پر دوسروں کی جانب سے ملنے والے پیغامات کو بھی چینلز میں شیئر کرنے کا فیچر پیش کیے جانے کا امکان ہے۔

جی ہاں، چینل فیچر فیس بک پیج کی طرح کا ایک اکاؤنٹ ہے، جہاں کوئی بھی شخصیت یا ادارہ اپنے مواد یا تشہیر کا مواد واٹس ایپ میسیج کرسکتا ہے۔

مذکورہ فیچر کی سب سے اہم بات یہ ہے کہ چینل کو صارفین کی جانب سے فالو بھی کیا جاسکتا ہے، تاہم صارف کا فون نمبر یا نام چینل چیٹ میں ظاہر نہیں ہوتا۔

نہ ہی کوئی صارف چینل میں میسیج کا ریپلائی کر سکتا ہے، البتہ صارفین کو یہ سہولت دی گئی ہے کہ وہ چینل کے میسیج کو فارورڈ کر سکے گا۔

لیکن اب خبر سامنے آئی ہے کہ واٹس ایپ کے ماہرین چینلز ایڈمن کی جانب سے اپنے چینل میں دوسروں کے فارورڈ میسیجز کو شیئر کرنے کے فیچر پر کام کر رہے ہیں۔

ماہرین فارورڈ میسیجز کو چینلز میں شیئر کرنے کے فیچر پر کام کر رہے ہیں، جس کے تحت صرف ایڈمن دوسرے چیٹس میں موصول ہونے والے میسیجز کو براہ راست چینلز میں شیئر کر سکیں گے۔

رپورٹ میں بتایا گیا کہ ممکنہ طور پر مذکورہ فیچر کے تحت ایڈمن کو یہ اختیار بھی دیا جائے گا کہ وہ ابتدائی طور پر فارورڈ میسیج کو چینل میں ڈرافٹ کے طور پر محفوظ کرے اور پھر اس کا جائزہ لے کر اسے شیئر کرے۔

ابھی یہ واضح نہیں ہے کہ فارورڈ میسیجز کے فیچر کو کب تک پیش کیا جائے گا، تاہم امکان ہے کہ اسے اگلے 6 ماہ میں پیش کردیا جائے گا۔