روس نے یوکرائن تنازع کے حل کے لیے جاری مذاکرات کو مغرب کی طرف سے مطالبات کا جواب آنے تک معطل کر دیا ہے۔
فرانسیسی خبر ادارے اے ایف پی کے مطابق امریکا اور نیٹو روس کے یوکرائن پر ممکنہ حملے کو روکنے کے لیے مزید مذاکرات پر زور دے رہے ہیں۔
گزشتہ ہفتے جنیوا، برسلز اور ویانا میں ہونے والے مذاکرات کشیدگی کو کم کرنے میں ناکام رہے کیونکہ روس کا اصرار ہے کہ سلامتی کی ضمانتوں اور یوکرائن کی نیٹو میں شمولیت پر مستقل پابندی کو سنجیدگی سے لیا جائے۔
روسی وزیر خارجہ سرگئی لاوروف نے کہا ہے کہ جب تک مغرب مناسب جواب نہیں دیتا تب تک مزید مذاکرات نہیں ہوں گے۔
انہوں نے اپنی جرمن ہم منصب کے ساتھ ایک مشترکہ پریس کانفرنس میں کہا کہ اب وہ مطالبات کے جوابات کا انتظار کر رہے ہیں جیسا کہ مذاکرات جاری رکھنے کے لیے وعدہ کیا گیا تھا، امید کرتے ہیں کہ یہ مذاکرات جاری رہیں گے۔
خیال رہے کہ امریکا نے ان مطالبات کو مکمل طور پر مسترد کر دیا ہے جن میں وارسا معاہدے کے سابق اتحادیوں جیسے پولینڈ اور سابق سویت بالٹک ریاستیں، جنہوں نے سرد جنگ کے بعد نیٹو میں شمولیت اختیار کرلی ہے، میں اتحادیوں کی تعیناتی پر بندش بھی شامل ہے۔
امریکی وزیر خارجہ انٹونی بلنکن بھی آج یوکرائنی دارالحکومت کیف پہنچے ہیں جہاں اُنہوں نے اپنے ہم منصب سے تازہ ترین صورتحال پر تبادلہ خیال کیا۔ وہ اپنے دورے کے دوران برلن بھی جائیں گے جہاں جمعرات کو وہ یورپی اتحادیوں سے بات چیت کریں گے۔
امریکی وزارتِ خارجہ کے ترجمان نیڈ پرائس کا کہنا ہے کہ اپنے دورے سے قبل اسٹیٹ سیکرٹری انٹونی بلنکن نے روسی وزیر خارجہ سرگئی لاوروف سے بات کرتے ہوئے تناؤ کو کم کرنے کے لیے سفارتی ذرائع اپنانے پر زور دیا ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News