حضور اکرم ﷺ کی شان میں گستاخی کرنے والے بی جے پی رہنماؤں نوین کمار جندال اور نوپور شرما کے خلاف مقدمہ درج کرلیا گیا۔

بھارتی میڈیا کی رپورٹ کے مطابق نئی دہلی پولیس نے نبی کریم ﷺکی شان میں گستاخی کرنے والی بی جے پی کی خاتون رہنما نوپور شرما، نوین کمار  جندال، آل انڈیا مجلس اتحاد المسلمین کے سربراہ اسداویسی  سمیت 9 افراد کے خلاف مقدمہ درج کرلیا ہے۔

ایف آئی آر میں بی جے پی کی سابق ترجمان نوپور شرما، نوین کمار جندال، ایم آئی ایم کے سربراہ اسد اویسی، سوامی یتی نرسمہانند کے علاوہ شاداب چوہان، صبا نقوی، مولانا مفتی ندیم، عبدالرحمان اور گلزار انصاری کو نامزد کیا گیا ہے۔

دہلی پولیس کے اسپیشل سیل نے مذہبی ہم آہنگی کو بگاڑنے، اشتعال انگیز بیان دینے،نفرت انگیز بیانات سے ماحول خراب کرنے کے الزامات پر تعزیرات ہند (آئی پی سی) کی دفعہ 153 اے، اور 505 (2) کے تحت مقدمہ بنایا ہے۔

اس حوالے سے ڈپٹی کمشنر آف پولیس کا کہنا ہے کہ ایف آئی آر مختلف مذاہب کے درمیان نفرت پھیلانے والے متعدد افراد کے خلاف ہے۔ دہلی پولیس پوچھ گچھ کے لیے تمام ملزمان کو نوٹس بھیجے گی۔

اس سے قبل ممبئی اور مہاراشٹر پولیس نے بھی نوپور شرما کے خلاف مقدمات درج کیے تھے۔

واضح رہے کہ بھارتی حکمراں جماعت (بی جے پی) کی سابق ترجمان نوپور شرما اور پارٹی کے ایک اور رہنما نوین کمار جندال نے چندروز قبل ایک نجی ٹی شو میں حضور اکرم صلی اللہ علیہ وسلم کی شان میں گستاخی کی تھی۔

ان کے اس بیان کے بعد پاکستان، ایران، یو اے ای، عمان اور قطر سمیت کئی مسلم ممالک نے شدید احتجاج کیا تھا۔ عمان کے مفتی اعظم کی جانب سے بھارتی مصنوعات کا بائیکاٹ کرنے کا اعلان بھی کیا گیاتھا۔