عالمی ادارہ صحت (ڈبلیو ایچ او) کی تازہ رپورٹ کے مطابق 13 مئی سے 2 جون تک 27 غیر مقامی ممالک کے لوگوں میں منکی پاکس کے کم ازکم 780 کیسز کی نشاندہی ہوئی ہے۔

تفصیلات کے مطابق دنیا کے مختلف ممالک میں اب تک منکی پاکس کے780 کیسز رپورٹ ہوچکے ہیں، زیادہ تر مریض یورپی ممالک میں سامنے آئے ہیں، ماہرین کا کہنا ہے کہ اس بیماری سے ہر شخص کو خطرہ ہوسکتا ہے۔

ڈبلیو ایچ او کا کہنا ہے کہ13 مئی اور 2 جون 2022 تک27 ممالک میں ڈبلیوایچ او کے ذریعہ منکی پاکس کے 780 کیسز کی تصدیق یا شناخت کی گئی ہے۔

اس طرح، ڈبلیو ایچ او نے257 تصدیق شدہ کیسز کے ساتھ وبائی صورتحال کے بارے میں اپنی آخری اپ ڈیٹ جاری کی تھی جسکے بعد 29 مئی سے مزید 523 کیسز کی تصدیق ہوئی ہے،  نئے اعداد و شمار وائرس کے واقعات میں 203 فیصد اضافے کی نشاندہی کرتے ہیں۔

ڈبلیو ایچ او کی جانب سے بیان میں کہا گیا ہے کہ “2 جون تک غیر مقامی ممالک میں موجودہ منکی پاکس سے منسلک کوئی موت نہیں ہوئی ہے، لیکن مقامی ممالک سے کیسز اور اموات کی اطلاع جاری ہے۔

منکی پاکس کیا ہے؟

منکی پاکس دراصل ایک ایسا وائرس ہے جو بنیادی طور پر جانوروں سے انسانوں میں منتقل ہوتا ہے۔ منکی پاکس، وائرس کے ’پاکس وائری ڈائے‘ (Poxviridae) فیملی سے تعلق رکھتا ہے، اس فیملی کو مزید 2 ذیلی خاندانوں میں تقسیم کیا گیا ہے جن میں 22 پرجاتیاں ہیں اور مجموعی طور پر اس فیملی میں وائرس کی 83 اقسام ہیں۔