قابض بھارتی فورسز نے گزشتہ 24 گھنٹوں کے دوران 4  کشمیری نوجوانوں کو شہید کردیا۔

کشمیر میڈیا سروس کی رپورٹ کے مطابق  قابض بھارتی فورسز نے ریاستی دہشت گردی کی تازہ کارروائی میں آج ضلع بڈگام میں  تین کشمیری نوجوانوں کو شہید کر دیا۔

بھارتی فوج نے گھر گھر تلاشی کے بہانے سے تین نوجوانوں کو  پہلے گرفتار  کیا اور بعد ازاں انہیں جعلی مقابلے میں شہید کردیا۔

بھارتی فوج نے اپنے اس ظالمانہ اقدام  کے بعد عوام کے احتجاج کے خوف سے  بڈگام کا محاصرہ کر کے مکینوں کی آمد و رفت پر پابندی عائد کی ہوئی ہے۔

گزشتہ 24 گھنٹوں کے دوران بھارتی فوج کی جانب سے جعلی مقابلوں میں شہید کیے جانے والے نوجوانوں کی تعداد 4 ہوگئی ہے۔

دوسری جانب بھارتی میڈیا کا کہنا ہے کہ  مقبوضہ کشمیر میں آج صبح بھارتی فوجی کیمپ پر خودکش حملے میں 3 اہلکار ہلاک  ہوگئے ہیں۔

مقبوضہ کشمیر کے علاقے راجوری کے پرگال فوجی کیمپ پر خودکش حملہ آج صبح کے وقت کیا گیا جس میں 3 بھارتی فوجی ہلاک اور  2 زخمی ہوئے۔

فوجی کیمپ پر خودکش حملے کے بعد علاقے میں بھارتی سیکیورٹی فورسز کے اہلکاروں نے گشت شروع کر دیا  ہے اور  کشمیریوں کو جگہ جگہ روک کر ان کی تلاشی لی جا رہی ہے۔