وسطی جاپان کے ہوکوریکو خطے میں طوفانی بارش کا سلسلہ جاری ہے۔ یہ بارش ہوا کے ایک کم دباؤ کے نظام کے سبب ہو رہی ہے۔

تفصیلات کے مطابق جاپانی موسمیاتی حکام نے نیگاتا اور یاماگاتا کے لئے اپنے بلند ترین درجے کے ہنگامی انتباہ کو صرف انتباہ کے درجے میں تبدیل کر دیا ہے۔

تاہم وہ اب بھی عوام سے ممکنہ خطرات کے حوالے سے محتاط رہنے کی اپیل کر رہے ہیں۔

نیگاتا کے مختلف حصوں میں جمعرات کی صبح تک چوبیس گھنٹوں میں پانچ سو ملی میٹر سے زیادہ بارش ہو چکی ہے۔

اس علاقے میں بحیرہ جاپان کے ساحل کے ساتھ غیرمعمولی سیلاب اور مٹی کے تودے گرنے کی بھی اطلاعات ہیں۔

موسمیاتی حکام مُوراکامی شہر کے رہائشیوں کو گھروں میں پناہ لینے یا محفوظ مقامات کی جانب انخلا کرنے کا کہہ رہےہیں۔

انہوں نے پانچ علاقوں  کے دو لاکھ سے زائد نفوس کے لئے انخلا کے احکامات بھی جاری کئے ہیں۔

جبکہ ملحقہ یاماگاتا  کے لوگوں کو بھی محتاط رہنے کا کہا گیا ہے۔

دریائے موگامی کا پانی پشتوں سے ابل پڑا جس کے باعث سڑکیں اور گھر زیر آب آ گئے۔

طوفانی بارش مزید جنوب اور مشرق میں بھی ریکارڈ کی گئی ہے۔ آئندہ چوبیس گھنٹوں یعنی جمعہ دن بارہ بجے تک جاپان کے بعض حصوں میں دو سو پچاس ملی میٹر تک بارش ہو سکتی ہے۔