پی ڈی ایم کے سربراہ مولانا فضل الرحمٰن کا کہنا ہے کہ کامیاب جلسے پر پوری قوم مبارکباد کی مستحق ہے۔

تفصیلات کے مطابق پاکستان ڈیموکریٹک موومنٹ (پی ڈی ایم) کے سربراہ مولانافضل الرحمٰن نے گیلانی ہاؤس میں میڈیا سے گفتگو کرتے ہوئے کہا کہ کامیاب جلسے پر پوری قوم مبارکباد کی مستحق ہے، ہم نے کہا تھا کہ جلسہ ہو کر رہے گا تو اللہ کی مدد سے ایسا ہی ہوا۔

انھوں نے کہا ہے کہ حکومتی رٹ ختم ہوچکی ہے، 8 دسمبر کو اسلام آباد میں پی ڈی ایم کا اجلاس ہوگا، گیلانی صاحب کے صاحبزادوں نے بڑی قربانیاں دیں، پی ڈی ایم کا یہ نظام آگے بڑھتا رہے گا۔

مولانا فضل الرحمٰن نے کہا کہ  ہم اپنے شیڈول کے مطابق آگے بڑھ رہےہیں ، رکاوٹیں بھی آگے آ رہی ہیں، جدوجہد ہوتی ہے لیکن نتیجہ اللہ کے ہاتھ میں ہوتا ہے، ہم نے انہیں مات دے دی ہے، شکست دی ہے اور ان کے عزائم ناکام بنادیئے ہیں، پی ڈی ایم کے اجلاس میں آئندہ کا لائحہ عمل طے کیاجائے گا، انہیں پورے ملک کے عوام نظر نہیں آتے جلسہ کیسے نظر آئے گا، عمران خان خود اور ان کی صوبائی حکومتیں لاتعلق ہیں۔

پی ڈی ایم کے سربراہ  نے کہا کہ حکومت کی معاشی پالیسی کے اثرات کئی سال تک رہتے ہیں،  مستقبل میں ضرورت پیش ہوئی تو پی ڈی ایم پلیٹ فارم پر فیصلہ کیا جائے گا۔

دوسری جانب سابق صدر آصف علی زرداری نے بھی اپوزیشن اتحاد پاکستان ڈیموکریٹک موومنٹ (پی ڈی ایم) کی قیادت سے پیپلز پارٹی کے یومِ تاسیس میں شرکت کرنے پر اظہارِ تشکر کیا ہے۔

 سابق صدر اور پاکستان پیپلز پارٹی کے شریک چیئرمین آصف علی زرداری نے پی ڈی ایم کی قیادت کے ساتھ ساتھ تمام سیاسی پارٹیوں کے کارکنوں کو بھی سلام پیش کیا ہے۔

انہوں نے کہا کہ سیاسی کارکن لاٹھی، گولی اور جیل سے نہیں ڈرتے، پارلیمنٹ کی بالا دستی اور آئین کی حکمرانی کی جدوجہد میں کامیاب ہوں گے۔

 پاکستان پیپلز پارٹی کے شریک چیئرمین کا مزید کہنا ہے کہ جمہوریت اور سیاسی پارٹیوں کو کمزور کرنے سے قومی یک جہتی متاثر ہوتی ہے، احتساب کی آڑ میں سیاسی قیادت کی کردار کشی سے ملک کی ساکھ متاثر ہوتی ہے۔