پاکستان کے معروف اور سب سے زیادہ فالو کیے جانے والے یوٹیوبر سعد الرحمان المعروف ڈکی بھائی ایک بار پھر خبروں کی توجہ کا مرکز بن گئے ہیں۔
چند ماہ قبل ڈکی بھائی کو مبینہ طور پر جوا ایپس کی تشہیر کے الزام میں ایئرپورٹ سے گرفتار کیا گیا تھا، جس کے بعد نومبر کے اختتام پر وہ ضمانت پر رہا ہوئے۔
رہائی کے بعد ڈکی بھائی نے دوبارہ یوٹیوب پر واپسی کرتے ہوئے روزانہ وی لاگز اپ لوڈ کرنا شروع کیے، تاہم ان کے پہلے وی لاگ پر ڈیڑھ کروڑ سے زائد ویوز آنے کے بعد سوشل میڈیا پر یہ قیاس آرائیاں کی جانے لگیں کہ انہوں نے ایک ہی ویڈیو سے کروڑوں روپے کما لیے ہیں۔
ان دعوؤں پر وضاحت کرتے ہوئے ڈکی بھائی نے اپنے تازہ وی لاگ میں بتایا کہ انہیں اس وقت اپنے یوٹیوب چینل تک مکمل رسائی حاصل نہیں، انہیں صرف ایڈیٹر لیول کی محدود رسائی دی گئی ہے، جس کے باعث وہ نہ ویڈیوز اپ لوڈ کر سکتے ہیں اور نہ ہی ڈیلیٹ۔
ڈکی بھائی کا کہنا تھا کہ ان کا ایڈسینس اکاؤنٹ بلاک ہے، جس کی وجہ سے انہیں اپنی کمائی یا ریونیو سے متعلق کوئی معلومات نظر نہیں آ رہیں۔
وی لاگ میں انہوں نے واضح کیا کہ حالیہ ویڈیوز سے انہیں کسی قسم کی آمدن حاصل نہیں ہوئی، موجودہ صورتحال میں یوٹیوب چینل عملی طور پر ان کی ملکیت نہیں رہا۔
ڈکی بھائی نے ناانصافی کا شکوہ کرتے ہوئے بتایا کہ اس وقت ان کے ریسٹورنٹ کے تمام معاملات اور اخراجات ان کے ساتھی اریب دیکھ رہے ہیں جبکہ وہ خود کئی امور پر خاموشی اختیار کیے ہوئے ہیں۔
