فیفا ورلڈکپ 2026 کے گروپ ڈی میں ترکیہ ٹورنامنٹ سے باہر ہوگیا جب کہ امریکا نے مسلسل دوسری کامیابی حاصل کرکے ناک آؤٹ مرحلے کے لیے کوالیفائی کرلیا۔
فیفا ورلڈکپ 2026 میں جمعے کو کھیلے گئے میچز میں پیراگوئے نے ترکیہ کو 1-0 سے شکست دی جب کہ امریکا نے آسٹریلیا کو 2-0 سے ہرایا۔
پیراگوئے نے میچ کے دوسرے ہی منٹ میں برتری حاصل کرلی جب ماتیاس گالارزا نے طویل فاصلے سے شاندار گول اسکور کیا جب کہ یہ گول میچ کا فیصلہ کن ثابت ہوا۔
پیراگوئے کو پہلے ہاف کے اختتامی لمحات میں اس وقت بڑا دھچکا لگا جب میگوئل المیرون کو ریڈ کارڈ دکھا کر میدان سے باہر بھیج دیا گیا تاہم 10 کھلاڑیوں کے ساتھ کھیلنے کے باوجود ٹیم نے بھرپور دفاعی کھیل پیش کیا اور اپنی برتری برقرار رکھی۔
ترکیہ نے میچ میں بال پر واضح کنٹرول رکھا اور متعدد حملے کیے تاہم فارورڈز گول کرنے میں ناکام رہے۔ ترک ٹیم نے درجنوں مواقع پیدا کیے لیکن ناقص فنشنگ کے باعث ایک بھی گول نہ کرسکی۔ شکست کے بعد ترکیہ کی ورلڈکپ میں آگے بڑھنے کی امیدیں ختم ہوگئیں۔
دوسری جانب سیئٹل میں کھیلے گئے میچ میں امریکا نے آسٹریلیا کو 2-0 سے شکست دے کر ناک آؤٹ مرحلے میں جگہ پکی کرلی۔
امریکی ٹیم کو ابتدائی برتری آسٹریلوی دفاعی کھلاڑی کے اپنے ہی گول کی بدولت ملی جب کہ دوسرا گول نوجوان الیکس فری مین نے اسکور کیا جسے وی اے آر جائزے کے بعد درست قرار دیا گیا۔
امریکا نے میچ کے بیشتر حصے میں گیند پر کنٹرول برقرار رکھا اور مسلسل دباؤ ڈالے رکھا۔ ٹیم کے اسٹار کھلاڑی کرسچن پُلیسک انجری کے باعث میچ نہیں کھیل سکے تاہم ان کی غیر موجودگی کے باوجود امریکی ٹیم نے متاثرکن کارکردگی دکھائی۔
دو میچوں میں دو فتوحات کے ساتھ امریکا گروپ ڈی میں پہلی پوزیشن پر پہنچ گیا ہے اور ناک آؤٹ مرحلے کے لیے کوالیفائی کرچکا ہے جبکہ پیراگوئے کی کامیابی نے گروپ کی صورتحال مزید دلچسپ بنادی ہے.
