رواں مالی سال کے ابتدائی 6 ماہ کے دوران ملکی برآمدات میں 24 فیصد سے زائد کا اضافہ ریکارڈ کیا گیا ہے۔

وفاقی ادارہ شماریات کے مطابق رواں مالی سال کی پہلی ششماہی میں 15 ارب 10 کروڑ روپے سے زائد کی اشیا برآمد کی گئیں۔

مزید پڑھیے: پاکستان کی امریکا کو برآمدات میں 43 فیصد سے زائد کا اضافہ

گزشتہ مالی سال (جولائی تا دسمبر 2020) کے دوران پاکستان نے 12 ارب 11 کروڑ ڈالر سے زائد مالیت کی برآمدات کی تھیں۔

اس طرح رواں مالی سال میں برآمدات کا حجم گزشتہ مالی سال کے مقابلے میں 24.71 فیصد زیادہ رہا۔

وفاقی ادارہ شماریات کے مطابق صرف دسمبر کے مہینے میں 2 ارب 74 کروڑ ڈالر کی برآمدات کی گئیں جب کہ گزشتہ سال اسی مہینے میں برآمدات کا حجم 2 ارب 33 کروڑ دالر رہا تھا۔

مزید پڑھیے: ٹیکسٹائل برآمدات میں 28 فیصد سے زائد کا اضافہ

دوسری جانب رواں مالی سال کی پہلی ششماہی میں درآمدات میں بھی 65 فیصد سے زائد کا اضافہ ریکارڈ کیا گیا۔

اعداد و شمار کے مطابق جولائی تا دسمبر 2021 کے دوران پاکستان نے 40 ارب 58 کروڑ ڈالر سے زائد کی اشیا دیگر ممالک سے منگوائیں جب کہ گزشتہ برس اسی دورانیئے میں درمدآت کا حجم 24 ارب 45 کروڑ ڈالر سے زائد تھا۔

سرکاری اعداد و شمار کے مطابق پاکستان کی ماہانہ بنیادوں پر برآمدات کا حجم 5 فیصد کم ہوا ہے، دسمبر میں پاکستان نے برآمدات سے 2 ارب 74 کروڑ ڈالر سے زائد زرمبادلہ کمایا جب کہ نومبر میں 2 ارب 90 کروڑ ڈالر کی برآمدات ہوئی تھیں۔

وفاقی ادارہ شماریات کے مطابق دسمبر میں پاکستان کے تجارتی خسارہ گزشتہ سال کے اسی مہینے کے مقابلے میں لگ بھگ 3 فیصد کم رہا، دسمبر 2020 میں پاکستان کی درآمدات کا حجم 7 ارب 89 کروڑ ڈالر تھا جب کہ رواں مالی سال دسمبر میں پاکستان نے 7 ارب 57 کروڑ ڈالر کی درآمدات کی تھیں۔