دین کی خاطر شوبز انڈسٹری کو خیر باد کہنے والی سابقہ اداکارہ نور بخاری کی رائے نے نیا تنازع کھڑا کر دیا۔

پاکستانی شوبز فنکاروں کی بھارتی اداکار کے ساتھ فیفا ورلڈ کپ 2022ء کے فائنل کے دوران لی گئی سیلفی سوشل میڈیا پر وائرل ہو گئی۔

فیفا ورلڈ کپ 2022ء کا فائنل میچ دیکھنے دنیا بھر سے اہم شخصیات قطر آئیں، وہیں بھارتی و پاکستانی فنکار بھی اسٹیڈیم میں موجود تھے۔

اس دوران بھارتی اداکاروں کے ہمراہ پاکستانی فنکاروں کی لی گئی سیلفیاں سوشل میڈیا پر خوب وائرل ہوگئی ہے۔

جن میں اداکارہ مہوش حیات، سجل علی، اداکار ہمایوں سعید، عدیل چوہدری، ٹی وی میزبان حسن چوہدری، پروڈیوسر ثمینہ ہمایوں سعید اور ثناء شاہ نواز وغیرہ شامل ہیں جو بالی ووڈ اداکار کارتک آریان کے ہمراہ دکھائی دے رہے ہیں۔

اس تصویر کو دیکھنے کے بعد نور بخاری نے کہا کہ کارتک آریان کے سامنے یہ تمام ستارے زیادہ بڑے اسٹارز ہیں، جس کے بعد سوشل میڈیا صارفین کے درمیان ایک نئی بحث چھڑ گئی، اور مختلف تبصروں کا سلسلہ شروع ہوگیا۔

صارفین کا کہنا ہے کہ اگر ایک ملک کے فنکار کسی دوسرے ملک کے فنکار کے ساتھ تصاویر بنوائیں، اور انہیں سوشل میڈیا پر شیئر کریں تو کیا فنکار ایک دوسرے سے چھوٹے بڑے ہو جاتے ہیں؟

واضح رہے کہ اتوار کی شب قطر میں فٹبال ورلڈکپ 2022ء کے فائنل میں ارجنٹینا نے فرانس کو شکست دے کر تیسری بار ورلڈ کپ اپنے نام کیا۔