ممبئی کرائم برانچ نے 14 اپریل کو باندرہ ویسٹ میں بالی ووڈ سپر اسٹار سلمان خان کی رہائش گاہ کے باہر فائرنگ کے واقعے کے سلسلے میں دو گرفتاریاں کی ہیں۔

اس خدشے کی تصدیق کرتے ہوئے، ممبئی پولیس نے بتایا کہ مشتبہ افراد کو گجرات کے بھوجھ ضلع سے پکڑا گیا تھا تاہم پولیس کی جانب سے گرفتار افراد کے بارے میں مزید تفصیلات جلد سامنے آئیں گی۔

سلمان خان کی رہائش گاہ کے باہر فائرنگ کے واقعے کے بعد ممبئی سے فرار ہونے والے دو مشتبہ افراد کو گجرات کے بھوجھ شہر میں گرفتار کر لیا گیا ہے، اور انہیں منگل کو مزید تفتیش کے لیے واپس ممبئی لایا جائے گا اور منگل کی سہ پہر عدالت میں پیش کیا جائے گا۔

خیال رہے کہ موٹر سائیکل پر سوار دو افراد نے اتوار کی صبح تقریباً 5 بجے باندرہ میں گلیکسی اپارٹمنٹس کے باہر چار فائرنگ کی تھی۔

فائرنگ کے بعد، مشتبہ افراد نے اپنی موٹرسائیکل ایک چرچ کے قریب چھوڑ دی، کچھ فاصلے پر چلے، اور پھر ایک آٹورکشا لے کر باندرہ ریلوے اسٹیشن گئے۔ وہاں سے، وہ سانتا کروز اسٹیشن کے لیے ٹرین میں سوار ہوئے اور دوسرا آٹورکشہ کرائے پر لیا۔

بعدازاں لارنس بشنوئی کے بھائی انمول بشنوئی نے سوشل میڈیا پر واقعے کی ذمہ داری قبول کی۔