بھارت کے معروف فلمساز سنجے لیلا بھنسالی کی پہلی ویب سیریز ہیرامنڈی میں اردو زبان کے ساتھ ’ناانصافی‘ کرنے پر شدید تنقید کی گئی ہے۔

یہ ویب سیریز یکم مئی کو نیٹ فلکس پر ریلیز ہوئی تھی، جس نے سامعین کو شاندار سیٹس، ویژول اور موسیقی سے مسحور کر دیا ہے۔

اس ویب سیریز کے حوالے سے بھارتی اداکار شیزان خان نے اداکاروں کی جانب سے اپنے مکالموں میں اردو کے الفاظ کو درست طریقے سے ادا نہ کرنے پر مایوسی کا اظہار کیا ہے۔

اس حوالے سے اپنے انسٹاگرام اکاؤنٹ کی اسٹوری پر انہوں نے کہا کہ ہیرامنڈی میں فریدہ جلال کے علاوہ کوئی اردو لفظ نہیں بول سکتا۔

ان کے مطابق ویب سیریز کی کاسٹ کو اردو لفظ کے تلفظ میں دشواری کا سامنا کرنا پڑا ہے اور ساتھ ہی ہیرامنڈی: ڈائمنڈ بازار میں اردو زبان کے ساتھ ہونے والی ’ناانصافی‘ پر افسوس کا اظہار کیا۔

واضح رہے کہ ویب سیریز کی کاسٹ میں منیشا کوئرالہ، سوناکشی سنہا، ادیتی راؤ حیدری، شرمین سہگل، سنجیدہ شیخ اور ریچا چڈھا شامل ہیں۔

سنجے لیلا بھنسالی کا ڈیجیٹل ڈیبیو ہیرامنڈی، آزادی سے پہلے کے ہندوستان کے وقت، لاہور کے ریڈ لائٹ ڈسٹرکٹ میں رہنے والے ‘ درباریوں کی کہانیوں’ پر مبنی ہے۔

ایک حالیہ انٹرویو کے دوران معروف فلمساز نے اعتراف کیا کہ وہ پاکستانی اداکارہ ماہرہ خان، اداکار فواد خان اور عمران عباس کو اس پروجیکٹ میں کاسٹ کرنا چاہتے تھے۔

انہوں نے انکشاف کیا کہ پاکستانی ستارے ماہرہ خان، فواد خان اور عمران عباس، جنہوں نے ماضی میں بالی ووڈ میں اپنی صلاحیتوں کا لوہا منوایا ہے، کاسٹ کے لیے ان کے ابتدائی انتخاب میں شامل تھے۔