مارول سنامیٹک یونیورس کی جانب سے مسلم سپر ہیرو پر بنائی گئی ویب سیریز “مس مارول” میں معروف پاکستانی گلوکار حسن رحیم کا گانا شامل کرلیا گیا ہے۔

کوک اسٹوڈیو سے شہرت حاصل کرنے والے گلوکار حسن رحیم کا گانا “پیچھے ہٹ“ اب ڈزنی پلس اور ایم سی یو کی “مس مارول“ کا حصہ بن گیا ہے۔

برطانوی خبر رساں ادارے سے وابستہ صحافی ہارون رشید نے ٹویٹر پر جاری اپنے پیغام میں بتایا کہ پاکستانی سُپر ہیرو کیریکٹر کمالہ خان پر بنائی گئی ویب سیریز “مس مارول“ میں نہ صرف  پاکستانی گانا ”پیچھے ہٹ“ شامل کیا گیا ہے بلکہ اس میں بولی وُڈ فلموں کے ڈائیلاگز بھی شامل ہیں۔

انہوں نے مزید لکھا کہ وہ مِس مارول کی دو قسطیں دیکھ چکے ہیں اور ویب سیریز میں جنوبی ایشیائی ٹچ دیکھ کر مزہ آیا۔

ہارون نے ایک تصویر بھی شیئر کی جس میں ان کے ساتھ پاکستانی نژاد امریکی اداکارہ ایمان ویلانی اور پاکستانی گلوکار حسن رحیم بھی موجود ہیں۔

LOVED the first 2 eps of Ms Marvel. This is the South Asian rep I want to see. Sugar-coated saunf, dialogue about @iamsrk’s best film, a soundtrack including @hasanraheeem’s Peechay Hutt. Kamala Khan is unapologetically brown and I LOVE IT. pic.twitter.com/O2CKjgUPvR

— Haroon Rashid (@iHaroonRashid) May 25, 2022

خیال رہے کہ  حسن رحیم کا گانا ”پیچھے ہٹ“ رواں برس کوک اسٹوڈیو کی جانب سے ریلیز کیا گیا تھا، جس میں گلوکار حسن رحیم کے علاوہ  طلعت قریشی اور جسٹن بیبیز نے گلوکاری ہے۔

مِس مارول کو امریکا سمیت دنیا بھر میں آئندہ ماہ 8 جون کو اسٹریمنگ پلیٹ فارم ڈزنی پلس پر ریلیز کیا جائے گا، تاہم پاکستان میں مذکورہ ویب سائٹ نہ ہونے کی وجہ سے اسے سنیماؤں میں دکھایا جائے گا۔