لکھاریوں کے بعد ہالی ووڈ کے اداکاروں کی جانب سے بھی ربردست ہڑتال کا اعلان کردیا گیا ہے۔

ہڑتال کا اعلان اسکرین ایکٹرز گلڈ نے اس وقت کیا جب یہ الائنس آف موشن پکچر کے ساتھ مزدوری کے نئے معاہدے تک پہنچنے میں ناکام رہی، جو تقریباً 160,000 فنکاروں کی نمائندگی کرتا ہے۔

1960 کے بعد یہ پہلا موقع ہے کہ دونوں یونینیں بیک وقت ہڑتال کر رہی ہیں۔

ہڑتال کا یہ اعلان ہالی ووڈ کے اداکاروں کی یونین کے اسٹریمنگ جائنٹ کے ساتھ مذاکرات بےنتیجہ ختم ہونے کے بعد کیا گیا ہے جبکہ دی اسکرین ایکٹر گلڈ کی جانب سے بڑے اسٹوڈیوز کے ساتھ مذاکرات کے ایک اور دور پر رضامندی کے باوجود ادائیگیوں اور اے آئی کے استعمال کے معاملے پر کوئی فیصلہ نہیں کیا جاسکا۔

بعدازاں SAG-AFTRA نے تصدیق کی کہ صنعتی کارروائی کا اعلان اس وقت کیا گیا جب قومی بورڈ نے متفقہ طور پر ہڑتال کے حق میں ووٹ دیا۔

خیال رہے کہ اسکرین ایکٹرز گلڈ (SAG-AFTRA) 160,000 اداکاروں کی نمائندگی کرتا ہے جس میں A-list ستارے بشمول ٹام کروز، انجلینا جولی اور جانی ڈیپ شامل ہیں۔ میریل اسٹریپ، بین اسٹیلر اور کولن فیرل سمیت مشہور شخصیات ہڑتال کے حق میں عوامی طور پر سامنے آئی ہیں۔

خیال رہے کہ ہڑتال کے باعث صنعت کے بہت زیادہ متاثر ہونے کی توقع ہے، جس کے نتیجے میں بہت سی پروڈکشنز کے بند ہونے یا تعطل کا شکار ہونے کا امکان ہے۔

واضح رہے کہ ہالی وڈ میں اسکرین رائٹرز 11 ہفتے سے ادائیگیوں کے معاملے اور دیگر مطالبات کی منظوری کیلئے ہڑتال پر ہیں۔