صحت مند رہنے کے لیے متوازن غذا کے ساتھ ورزش کرنا نہایت ضروری ہے۔ لوگوں کی اکثریت کا خیال ہے کہ ورزش کے لیے جم جانا اور طویل دورانئے کی ورزشیں کرنا ہی آپ کو صحت مند رکھ سکتا ہے۔

 تاہم حال میں کی جانے والی ایک تحقیق کے مطابق ہر آدھے گھنٹے میں محض چند منٹ کی سرگرمی آپ کی صحت کو بہتر بنا سکتی ہے۔

دی امریکن جرنل آف فزیالوجی، اینڈو کرائنولوجی اینڈ میٹابولزم میں کی گئی ایک حالیہ تحقیق کے مطابق  جسم کو ہر گھنٹے میں دو بار محض تین منٹ تک متحرک  رکھنے سے صحت کے مثبت فوائد حاصل کئے جاسکتے ہیں۔ یعنی صرف تین منٹ کی ورزش مجموعی صحت اور جسمانی تندرستی پرمثبت اثرات مرتب کرتی ہے۔

مختصر دوانئے کی ورزش کے صحت پر اثرات جاننے کے لیے محققین نے اس مطالعے میں سٹاک ہوم میں رہنے والے 16 درمیانی عمر کے مرد اور خواتین شامل کیا جو موٹے ہونے کے ساتھ عام ڈیسک کی ملازمتیں کرتے تھے۔

ایک ہفتے تک جاری رہنی والی اس تحقیق میں شامل شرکاء کو ہر 30 منٹ میں تین منٹ کے لیے فعال رہنے کی ہدایت کی گئی۔

نتائج کے مطابق طویل عرصے تک بیٹھنے اور تقریباً تین منٹ تک حرکت کرنے کے بعد  لمبے عرصے تک بیٹھنے کے اثرات کو کم کرنے میں مدد ملی۔

تاہم، محققین کا یہ بھی کہنا ہے کہ تین منٹ کو کم از کم سمجھا جانا چاہیے اگر آپ زیادہ حرکت کر سکتے ہیں یہ اور بھی بہتر ہے۔

محققین کا کہنا ہے کہ منی ورزش دن بھر میں اپنے آپ کو فٹ رکھنے کا ایک بہترین حل ہے۔ کیونکہ مصروف زندگی کی وجہ سے ہرکسی کے لیے جم میں جاکر طویل سیشن لینا ممکن نہیں ہے۔

تاہم اب سوال یہ پیدا ہوتا ہے ہر آدھے گھنٹے بعد تین منٹ کے لیے کونسی ورزش کی جائے جو صحت کو بہتر بنانے میں معاون ثابت ہوسکے، یہاں چند نہایت آسان ورزشوں کے بارے میں بتایا جو اس ضمن میں مفید ثابت ہوں گی۔

پلانکس

یہ ایک ایسی ورزش ہے جسے تین منٹ تک آسانی کے ساتھ ہر جگہ کیا جاسکتا ہے، چاہے آپ دفتر میں ہوں یا گھر میں۔

پلانک کرتے وقت ضروری نہیں ہے کہ آپ اسے ایک منٹ کریں تیس سیکنڈ کے بعد وقفہ دے کر دوبارہ کریں۔ پلانکس ورزش آپ کے جسم میں طاقت اور توازن کو بہتر بنانے مدد فراہم کرتی ہے۔

آرم سونگ

 اس ورزش میں پہلے بازؤں کو اگے کی جانب دائروں میں گھومایا جاتا ہے پھر پیچھے کی جانب یہ بھی آپ ہر جگہ آسانی سے کرسکتے ہیں۔

سپر وومن پوز

یہ پوز گھر میں موجود افراد آسانی سے کر سکتے ہیں  سپر وومین پوز ایک بہترین ورزش ہے۔ جسے زمین پر لیٹ کر شروع کیا جاتا ہے اس میں  ٹانگوں اور بازؤں کو ایک ساتھ اٹھایا جاتا ہے کچھ دیراسی  پوزیشن میں رہ کر سیدھے لیٹ جاتے ہیں پھر چند سیکنڈ کے بعد اسی عمل کو دوبارہ دہرایا جاتا ہے اس طرح تین منٹ کا وقت پورا کیاجاسکتا ہے۔

باڈی ویٹ اسکواٹس

اسکواٹس کے فائدوں سے کون واقف نہیں یہ آپ کی کمر اور پیروں کے لیے ایک بہترین ورزش ہے۔ اس میں بغیر کسی کرسی کے بیٹھنے کی پوزیشن اختیار کی جاتی ہے۔

گھٹنے کو اوپر اٹھانا

گھٹنوں کو بازوں کی مدد سے اتنا اوپر اٹھانا کہ یہ سینے تک پہنچ جائیں اس طرح باری باری یہ ورزش دونوں پیروں کے ساتھ کی جاتی ہے۔

چہل قدمی

یہ ورزش کی سب سے آسان قسم ہے جو کسی بھی کام کے دوران جیسے فون پر بات کرتے ہوئے کچھ لکھتے ہوئے بھی انجام دی جاسکتی ہے۔

اگر آپ کے پاس ہر آدھے گھنٹے میں 3 منٹ نہ ہوں تو کیا ہوگا؟

ہر آدھے گھنٹے میں مختصر وقفہ لینا ہر کسی کے کام کے انداز، نظام الاوقات یا ماحول کے لیے ممکن نہیں ہو سکتا۔ نقطہ یہ ہے کہ دن میں متعدد بار مختصر وقت کی ورزش کرنے کو یقینی بنائیں، تاکہ آپ کی صحت بہتر رہ سکے۔

تاہم ماہرین دن میں کم از کم تین بار دس منٹ کی ورزش کا وقفہ لینے کا مشورہ دیتے ہیں۔ مصروف دنوں میں جب آپ کے پاس جم جانے کا وقت نہیں ہوتا تو ورزش کو کئی مختصر دورانئے میں تبدیل کے فائدہ حاصل کیاجاسکتا ہے۔