آج ہم آپکو عمر بڑھنے کے باوجود خود کو جوان رکھنے کا نہایت ہی آسان طریقہ بتائیں گے۔

ایک حالیہ تحقیق میں چکنائی کے ایک ایسے مالیکیول کی شناخت کی گئی جو عمر میں اضافے سے ہونے والی جسمانی تنزلی میں کردار ادا کرتا ہے۔

بی ایم پی نامی اس مالیکیول کی جسم کے اندر سطح جوان افراد کے مقابلے میں بوڑھے افراد میں زیادہ ہوتی ہے، مگر ورزش کرنے سے اس میں کمی آتی ہے۔

محققین نے بتایا کہ یہ پہلے سے معلوم ہے کہ جسم کے اندر چکنائی جیسے کولیسٹرول بڑھاپے کی جانب سفر اور مختلف امراض میں کردار ادا کرتا ہے، مگر چکنائی کے پیچیدہ مالیکیولز کے کردار کے بارے میں زیادہ تفصیلات موجود نہیں۔

انہوں نے کہا کہ بظاہر اس مالیکیول کی سطح اور بڑھاپے کی جانب سے سفر کے درمیان تعلق نظر آتا ہے مگر اس کی تصدیق کے لیے مزید تحقیق کی ضرورت ہے۔

تحقیق میں یہ بھی دریافت کیا گیا کہ روزانہ ورزش کرنے سے جسم میں اس مالیکیول کی سطح کو کم رکھنے میں مدد ملتی ہے۔

نتائج سے معلوم ہوا کہ ورزش سے مالیکیول کی سطح میں مختصر وقت کے لیے نمایاں کمی آتی ہے، یعنی ورزش سے بڑھاپے کی جانب سفر کو سست کرنے میں مدد ملتی ہے۔

محققین کے مطابق ورزش خود کو زیادہ عرصے تک جوان رکھنے کا ایک طاقتور ٹول ہے کیونکہ اس سے عمر میں بڑھنے سے جمع ہونے والی چکنائی کو گھلانا ممکن ہو جاتا ہے۔

انہوں نے بتایا کہ تیز رفتار سے چہل قدمی یا بھاگنے سے آپ خود کو زیادہ وقت تک جوان رکھ سکتے ہیں۔